OPEC+-ის ქვეყნებმა გადაწყვიტეს ალიანსის ამჟამინდელი სტრატეგია შეინარჩუნონ და იანვარში ნავთობის მოპოვება დაგეგმილი 400 ათასი ბარელით გაზარდონ. ამის შესახებ ინფორმაციას სააგენტო Bloomberg ავრცელებს.
OPEC + შემდეგი შეხვედრა 4 იანვარს გაიმართება.
ალიანსის მონიტორინგის კომიტეტი მოიცავს 8 ქვეყანას, რომლებიც ხელმძღვანელობენ ორგანოს მუშაობას. ესენია: ალჟირი, ვენესუელა, ერაყი, ყაზახეთი, ქუვეითი, არაბეთის გაერთიანებული საემიროები, რუსეთი და საუდის არაბეთი.
კორონავირუსის პანდემიით გამოწვეული ნავთობზე მოთხოვნის შემცირების გამო, OPEC+-მა გასული წლის მაისიდან მოყოლებული, მოპოვება 9,7 მილიონი ბარელით შეამცირა.
ვითარების სტაბილიზაციასთან ერთად, ნავთობის მოპოვება მეტ-ნაკლებად აღდგა. 2021 წლის აგვისტოდან ალიანსმა ნავთობის წარმოება ყოველთვიურად 400 ათასი ბარელით გაზარდა.
მას შემდეგ ორგანიზაციის წევრი ქვეყნები ყოველთვიურად იკრიბებიან და მომავალი თვისთვის წარმოების გეგმას განიხილავენ.