ავარიის შედეგად დაშავებული 12 წლის გოგოს მდგომარეობა მძიმეა, - ამის შესახებ report.ge-ს ბათუმის დედათა და ბავშვთა ცენტრში განუცხადეს.
,,ბავშვი მოთავსებულია კრიტიკული მედიცინის დეპარტამენტში, მიმდინარეობს მონიტორინგი და მკურნალობა. შესაბამისი კვლევები უტარდება. აღენიშნება თავის ტვინის ტრამვა და მდგომარეობა არის მძიმე, მაგრამ სტაბილური", - განაცხადა კლინიკის ხელმძღვანელმა თამარ ბახტაძემ.
გონიოში მსუბუქი ავტომობილი მოზარდს დაეჯახა. არსებული ინფორმაციით, 12 წლის გოგო, ახალსოფლის სკოლის მიმდებარედ ქუჩაზე გადადიოდა. თვითმხილველების თქმით, სწრაფად მოძრავმა ავტომობილმა დამუხრუჭება ვერ მოახერხა.
როგორც report.ge-ს შინაგან საქმეთა სამინისტროში უთხრეს, აღნიშნულთან დაკავშირებით საგამოძიებო მოქმედებები მიმდინარეობს.
გამოძიება 276-ე მუხლის მეორე ნაწილით დაიწყო. ისჯება თავისუფლების აღკვეთით ვადით ხუთ წლამდე.