დიდი ბრიტანეთის სპეცსამსახურებმა ახალი ტიპის კორონავირუსის ხელოვნური, ლაბორატორიაში წარმოშობის ვერსიის გადამოწმება დამოუკიდებლად დაიწყეს. ამ საკითხთან დაკავშირებით ისინი შეერთებულ შტატებთან ითანამშრომლებენ.
მანამდე, აშშ-ის პრეზიდენტმა ჯო ბაიდენმა განაცხადა, რომ ამერიკული სადაზვერვო სამსახურები კორონავირუსის წარმოშობის ორ ვერსიას ამუშავებენ - ცხოველიდან ადამიანზე ბუნებრივი ტრანსმისია და ვირუსის სამეცნიერო ლაბორატორიიდან გაჟონვა.
ბაიდენმა ინფორმაციის შეგროვებისა და ანალიზისთვის 90 დღე გამოყო.
როგორც ბრიტანულმა წყარომ აღნიშნა, დიდი ბრიტანეთი ასევე არ გამორიცხავს SARS-CoV-2-ის ხელოვნურ წარმოშობას.
მიმდინარე წლის მარტში, მსოფლიო ჯანდაცვის ორგანიზაციამ (WHO) გამოაქვეყნა ექსპერტთა საერთაშორისო ჯგუფის მუშაობის შედეგები. მოხსენებაში აღნიშნულია, რომ ლაბორატორიიდან გაჟონვა "ნაკლებად სავარაუდოა", მთავარ ვერსიად შესაძლოა ვირუსის ღამურებიდან ადამიანზე გადაცემა ჩაითვალოს.