ეგვიპტეში მატარებლის გამცილებელი დააკავეს, რომელმაც ორ უბილეთო ახალგაზრდას ტრანსპორტის დატოვება და ლიანდაგებზე გადახტომა აიძულა. ინციდენტის შედეგად ერთი ადამიანი დაიღუპა.
გამცილებლის და მგზავრების კონფლიქტი ვაგონში მყოფმა ერთ-ერთმა ადამიანმა გადაიღო. ფაქტს დიდი გამოხმაურება მოჰყვა. საზოგადოება გამცილებლის პასუხისმგებლობის საკითხის დაყენებას ითხოვდა.
რკინიგზის დეპარტამენტის განცხადებით, მან უბილეთო პირებს მგზავრობის საფასურის გადახდა მოსთხოვა, რაზეც უარი მიიღო. შემდეგ კი კარი გააღო და უთხრა, რომ მატარებელი დაეტოვებინათ.
გამცილებელი ამჟამად წინასწარ პატიმრობაშია. მიმდინარეობს გამოძიება.