ისრაელის ტურიზმის მინისტრმა, ორიტ ფარკაშ-ჰაკოენმა საერთაშორისო ტურიზმის აღდგენის გეგმა წარმოადგინა. ინფორმაციას ამის შესახებ სამინისტრო ავრცელებს.
"დღეისათვის ისრაელში მოსახლეობის 25% უკვე ვაქცინირებულია. ჩვენ საერთაშორისო ტურიზმის დაბრუნების გეგმების დასახვა შეგვიძლია", - განაცხადა მინისტრმა.
ორიტ ფარკაშ-ჰაკოენის თქმით, ავიამიმოსვლის განახლების თარიღის დასახელება დამოკიდებული იქნება კაფსულური ტურიზმის სისტემის შექმნაზე, ანუ სტუმრების ჯგუფებად დაყოფაზე.
კერძოდ, თვითმფრინავში ჩაჯდომამდე ტურისტებმა ჯანმრთელობის მდგომარეობა "მწვანე პასპორტის", გამოჯანმრთელების შესახებ სერტიფიკატის, ან COVID-19-ზე უარყოფითი ტესტის საშუალებით უნდა დაადასტურონ.
მინისტრი ასევე სთავაზობს სასტუმროების დაუყოვნებლივ გახსნას, თუ სტუმარი ამ ცნობებიდან ერთ-ერთს წარმოადგენს. ამასთან, სასტუმროებში საერთო სასადილოები აღარ იქნება.
ორიტ ფარკაშ-ჰაკოენის აზრით, ასეთივე პირობებში შესაძლებელია კაფეების და რესტორნების გახსნა 50% დატვირთვით. აქ შემოსვლამდე ტურისტებმა სამედიცინო ცნობები უნდა წარადგინონ.
ანალოგიურ ზომებს მინისტრი ღირსშესანიშნაობების შემთხვევაშიც სთავაზობს. ასე ყველა ბუნებრივი ნაკრძალი მალე შეძლებს მუშაობის აღდგენას.