სამხრეთ კორეამ ახალი კორონავირუსის პანდემიასთან დაკავშირებული შეზღუდვების ნაწილი მოხსნა. ამის შესახებ ქვეყნის პრემიერ-მინისტრმა ჩონ სე გუნმა განაცხადა.
შემსუბუქებულ წესებს შორის არის ტაძრებში, ლოცვაზე დასწრების უფლება. მოქალაქეებს ასევე მიეცათ სპორტულ ღონისძიებებში მონაწილეობის საშუალება, თუმცა ერთი პირობით - ისინი გულშემატკივრის გარეშე უნდა ჩატარდეს.
შეზღუდვების ნაწილი მას შემდეგ მოიხსნა, რაც ინფიცირების დადასტურებული შემთხვევების ყოველდღიურმა მაჩვენებელმა იკლო.
ამასთან, ქვეყნის ხელისუფლებამ მოსახლეობას სოციალური დისტანციის მნიშვნელობაც შეახსენა.
"იმ შემთხვევაში, თუკი 6 მაისამდე შევძლებთ შევინარჩუნოთ სტაბილური მდგომარეობა, გადავალთ რუტინულ სოციალურ დისტანციაზე", - განაცხადა პრემიერ-მინისტრმა.
ამ დროისათვის, სამხრეთ კორეაში ახალი კორონავირუსით ინფიცირების 10 600-ზე მეტი შემთხვევაა დადასტურებული.