ამერიკული ფარმაცევტული კომპანია Pfizer ანტივირუსული პერორალური პრეპარატის PF-07321332 ცდების 2/3 ფაზას იწყებს, რომელიც, როგორც მოსალოდნელია, COVID-19-ის პროფილაქტიკურ საშუალებად იქცევა. ამის შესახებ ინფორმაცია კომპანიის ვებ-გვერდზეა განთავსებული.
პრეპარატის შემქმნელები ვარაუდობენ, რომ ცდების წარმატების შემთხვევაში, თერაპია ვირუსის ადრეულ სტადიაზე შეჩერებას შეძლებს, ანუ მანამდე, სანამ ვირუსს ფართოდ გავრცელების შესაძლებლობა გაუჩნდება. ამასთან, პრეპარატმა უნდა მოახდინოს სიმპტომების პრევენცია უკვე დაინფიცირებულებში.
ცდები კლინიკური კვლევების გლობალური პროგრამის ნაწილია. მასში 18 წელს ზემოთ ასაკის 2 660 ადამიანი მონაწილეობს.
ცდების მონაწილეთა ნახევარი პლაცებოს მიიღებს, მეორე ნახევარი კი პრეპარატს PF-07321332.
კვლევების შედეგად უნდა დადგინდეს, რამდენად უსაფრთხო და ეფექტურია პრეპარატი კორონავირუსით ინფიცირების პრევენციისა და მისი სიმპტომების შერბულების კუთხით.
კვლევების წინა ფაზამ აჩვენა, რომ პრეპარატი უსაფრთხოა და განსაკუთრებული გართულებები არ ფიქსირდებოდა.