გავრცელებული ინფორმაციით, ვალერიან ნემსიწვერიძე, რომელიც ავჭალაში, საკუთარ ავტომანქანაში ჩაცხრილეს, ე.წ. ციხის ბუნტის ერთ-ერთი ორგანიზატორია. ის პატიმრობიდან 2013 წელს, ამნისტიის საფუძველზე გათავისუფლდა.
არის თუ არა ვალერიან ნემსიწვერიძე ე.წ. ციხის ბუნტის ერთ-ერთი ორგანიზატორი, აღნიშნულთან დაკავშირებით მედიის წარმომადგენლებმა კითხვა შსს-ს წარმომადგენელს, კახა მურადაშვილს დაუსვეს, რომელიც შემთხვევის ადგილზე იმყოფებოდა.
მურადაშვილის თქმით, საკითხთან დაკავშირებით შინაგან საქმეთა სამინისტროში კომენტარი მოგვიანებით გაკეთდება.
როგორც report.ge-ს შინაგან საქმეთა სამინისტროში განუცხადეს, ფაქტზე გამოძიება 108-ე (განზრახ მკვლელობა) და 236-ე მუხლის (ცეცხლსასროლი იარაღის, მართლსაწინააღმდეგო შეძენა, შენახვა, ტარება) მე-3 და მე-4 ნაწილით მიმდინარეობს. სხვა დეტალებზე უწყებაში ჯერჯერობით არ საუბრობენ.
