რუსთავის საკრებულოს წევრის დაჭრის ფაქტზე მისი მეზობელი დააკავეს. ინფორმაცია შსს-მ გაავრცელა.
"რუსთავის საქალაქო სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1986 წელს დაბადებული, წარსულში ნასამართლევი ნ.ტ. ჯანმრთელობის განზრახ მძიმე დაზიანების ბრალდებით დააკავეს", - აღნიშნულია გავრცელებულ ინფორმაციაში.
დანაშაული 3-დან 6 წლამდე ვადით თავისუფლების აღკვეთას ითვალისწინებს.
დანაშაული ურთიერთშელაპარაკების ნიადაგზე მოხდა. გიორგი მღებრიშვილს ბრალდებულმა ქვედა კიდურის არეში ცივი იარაღის გამოყენებით ჭრილობა მიაყენა და შემთხვევის ადგილიდან მიიმალა.
დაჭრილი კლინიკაში გადაიყვანეს.
გამოძიება სსკ-ის 117-ე მუხლის პირველი ნაწილით მიმდინარეობს.
