„ფაქტი სახეზეა, რომ ისინი (მთავრობა) ამ თანხას ვერ ითვსებენ, ან არაეფექტურად ითვისებენ,“ - ამის შესახებ ეკონომისტმა აკაკი ცომაიამ მთავრობის მიერ საგარეო ვალის ათვისებაზე კომენტირებისას განაცხადა. საკითხი ეხება 2019 წლის ბიუჯეტში შესატან ცვლილებებს, რომლის მიხედვითაც, ხელისუფლება 231 მლნ ლარით 13.3 მლრდ-მდე ზრდის სახელმწიფო ბიუჯეტის ხარჯებს. გარდა ამისა, ირკვევა, რომ წელს მთავრობა არა - 400 მლნ-ის, არამედ 900 მლნ ლარის შიდა ვალს აიღებს, მაშინ როდესაც ვერ აითვისეს გრძელვადიანი საინვესტიციო კრედიტები 360 მლნ ლარის ოდენობით.
როგორც ეკონომისტი განმარტავს, არანაირი გარანტია და მოცემულობა იმისა არ არსებობს, რომ მომავალში ხელისუფლება გახდება გაცილებით უფრო პროდუქტიული, შედეგად მისი შრომის ნაყოფიერების მაჩვენებლები მოიმატებს, ხოლო რუტინული შრომით შეძლებენ და ორმაგად აითვისებენ იმ თანხებს, რა თანხებიც ამ ხნის განმავლობაში ვერ აითვისეს.
„რატომ ვერ ითვისებენ იმ თანხებს, რომელსაც იღებენ ვალად? ამ კითხვაზე პასუხი ძალიან მარტივია, სახეზეა არაკომპეტენტურობა და მეტი არაფერი. არ იციან მუშაობის პრინციპი, ქვეყნის კანონმდებლობას არ იცნობენ, ასევე არ იციან, რა ვადებში უნდა გამოაცხადონ ტენდერები და არ უყვართ საკუთარ თავზე პასუხისმგებლობის აღება. არ იციან ხელშეკრულებები როგორ უნდა გააფორმონ. არ იციან, ფულის ხარჯვას მონიტორინგი როგორ უნდა გაუწიონ. არ იციან, რა ვადებში უნდა მოხდეს ფულის გადარიცხვა და შემდგომ ამის შემდგომი ათვისება. ეს არის კონკრეტული დეტალები, რომელიც ადმინისტრირების პროცესს უკავშირდება, რომელიც კანონმდებლობით უკვე წინასწარ არის გაწერილი. გარდა ამისა ჩვენ პროგრამული ბიუჯეტი არ გვაქვს, ანუ კონკრეტული დანახარჯი რა ეფექტის მომტანი იქნება, რას დაკარგავს საზოგადოება და სანაცვლოდ რას მიიღებს“ - განაცხადა ცომაიამ.
ბელა გელაშვილი
ავტორი