ამერიკული სატელეკომუნიკაციო კომპანიები AT&T და Verizon 5G ქსელის ინტერნეტის გაშვების ხელახლა გადადებაზე შეთანხმდნენ. Report.ge-ს ცნობით, ინფორმაციას DW ავრცელებს.
გამოცემის ინფორმაციით, მისი გაშვება ავიაციისთვის პოტენციური რისკების გამო გადაიდო.
AT&T-ის განცხადებაში ნათქვამია, რომ ორკვირიანი დამატებითი გადადება აშშ-ს ტრანსპორტის მდივანმა, პიტ ბატეჯეჯმა მოითხოვა. ამავდროულად, კომპანიამ ხაზი გაუსვა, რომ 5G სატელეკომუნიკაციო ქსელები საფრთხეს არ უქმნის საავიაციო უსაფრთხოებას.
"დარწმუნებულნი ვართ, რომ შემდგომი თანამშრომლობა და ტექნიკური შეფასება შეამსუბუქებს ნებისმიერ შეშფოთებას", - ნათქვამია AT&T-ის განცხადებაში.
ქსელის გაშვება თავდაპირველად 2021 წლის 5 დეკემბერს იყო დაგეგმილი, მაგრამ თვითმფრინავების მწარმოებლების Airbus-ისა და Boeing-ის შეშფოთების გამო, 5 იანვრამდე გადაიდო.