"საქსტატის" აღმასრულებელი დირექტორის, გოგიტა თოდრაძის ინფორმაციით, აზარტული თამაშების სექტორის ბრუნვა 85%-90%-ით არის შემცირებული.
ამის შესახებ მან ივნისის ეკონომიკური ვარდნის შესახებ გამართულ ბრიფინგზე განაცხადა.
“კლების ტენდენცია შეინიშნებოდა ხელოვნების გართობის და დასვნების სექტორებში, რაც დაკავშირებული იყო აზარტულ და ფულზე თამაშებთან დაკავშირებული კომპანიების ბრუნვის მოცულობის შემცირებასთან. დაახლოებით 85%-90%-ით არის შემცირებული მსგავსი ტიპის კომპანიების ბრუნვის მოცულობა წინა წლის შესაბამის პერიოდთან შედარებით,”- განაცხადა გოგიტა თოდრაძემ.
შეგახსენებთ, "საქსტატი" სექტორების მიხედვით ეკონომიკური ვარდნის შესახებ სტატისტიკურ ინფორმაციას მომდევნო თვეში გამოაქვეყნებს და სწორედ მაშინ გახდება ცნობილი მეტი დეტალი აზარტული თამაშების სექტორის შემოსავლების, ბიუჯეტში შეტანილი თანხის და ზოგადად ამ ინდუსტრიის ფიანანსური მაჩვენებელების შესახებ.
მანამდე კი ცნობილია, რომ ივნისის ეკონომიკური ზრდის მაჩვენებლები გამოაქვეყნა. მონაცემებით ირკვევა, რომ გასული თვის განმავლობაში საქართველოს ეკონომიკა 2019 წლის ანალოგიურ პერიოდთან შედარებით 7.7%-ით შემცირდა. ჯამურად მეორე კვარტალში საქართველოს ეკონომიკის ვარდნა 12.6% იყო, რაც ბოლო ათწლეულის განმავლობაში კვარტალური ეკონომიკური ვარდნის ყველაზე მაღალი მაჩვენებელია.
"ბოლო ექსვს თვეში 17%-ით არის შემცირებული, წინა წელთან შედარებით, მშენებლობებზე გაცემული ნებართვები, უფრო მეტად, 27%-ით არის შემცირებული გაცემული ნებართვების ფართობები. ყველაზე მეტი შემცირება აჭარის ავტონომიურ რესპუბლიკაზე მოდის, სადაც დაახლოებით 50%-ით შემცირდა გაცემული ნებართვების რაოდენობა. რაც შეეხება ექსპლოატაციაში მიღებული შენობების რაოდენობას, ის 35%-ით არის შემცირებული.
გარდა ამისა 22%-ით შემცირდა სამშენებლო მასალების იმპორტი, თუმცა, ივნისში 45%-ით გაიზარდა ცემენტის იმპორტის რაოდენობა, რაც გარკვეულად იმედისმომცემი მაჩვენებელია.
ივნისში დაახლოებით 80%-ით შემცირდა ფეროსილოკონ მანგანუმის ექსპორტის მაჩვენებელი.
ასევე აღსანიშნავია წარმოების მოცულობის შემცირება მინერალური წყლების წარმოების მიმართულებით, შესაბამისად 36%-ით შემცირდა მინერალური წყლების ექსპორტის მაჩვენებელი.
ივნისში წინა წლის შესაბამის პერიოდთან შედარებით 95%-ით შემცირდა საერთაშორისო ვიზიტორების მიერ განხორციელებული ვიზიტების რაოდენობა, რაც ტურიზმის სექტორში კლების მიზეზი იყო.
ტრანსპორტის სექტორში კლება დაკავშირებულია საჰაერო ტრანსპორტის ფუნქციონირებასთან.
დადებითი ტენდენციები შეინიშნებოდა სამთო-მოპოვებით სექტორში, რაც დაკავშირებული იყო ფერადი ლითონების მადნების მოპოვებასთან. ასევე დადებითი ტენდენციები იყო წყალმომარაგებისა და ნარჩენების მართვის სექტორში," - განმარტავს სტატისტიკის ეროვნული სამსახურის უფროსი, გოგიტა თოდრაძე.
ბელა გელაშვილი
ავტორი