პარლამენტის ჯანდაცვის კომიტეტმა მხარი არ დაუჭირა „საქართველოს ბიზნეს ასოციაციის“ (BAG) საკანონმდებლო წინადადებას „თამბაქოს კონტროლის კანონის შესახებ“. საკანონმდებლო წინადადება თამბაქოს ნაწარმის რეალიზაციის თვალსაზრისით არსებულ რეგულაციაში გარკვეული ცვლილებების შეტანას ისახავდა მიზნად.
BAG-ის საკანონმდებლო წინადადების მიხედვით, საქართველოში ამჟამად მოქმედებს გაცილებით უფრო მკაცრი მოთხოვნები სიგარეტის ალტერნატიული და არაწვადი პროდუქტების მიმართ, ვიდრე ამას ევროდირექტივა ითვალისწინებს. წარდგენილი კანონპროექტით ერთმანეთისგან განსხვავებული რეგულირება უნდა დაწესებულიყო თამბაქოს ახალი თაობის პროდუქტების ბაზარზე განთავსების და რეალიზაციასთან მიმართებით. საკანონმდებლო ინიციატივის ავტორები მიუთითებებენ, რომ ამგვარი მიდგომა თავისმხრივ ეფუძნება არაერთი ქვეყნის, მათ შორის აშშ-ისა და ევროკავშირის წევრი ქვეყნების პრაქტიკას, სადაც თამბაქოს ზიანის შემცირების პოლიტიკისთვის თამბაქოს ალტერნატიულ და არაწვად პროდუქტებს განსაკუთრებული მნიშვნელობა ენიჭებათ.
კიდევ ერთი ცვლილება, რასაც საკანონმდებლო ინიციატივა ითვალისწინებს “სტანდარტული შეფუთვის”, ანუ ე.წ. “სადა შეფუთვის” საკითხია. ამ ნორმის მიხედვით, 2022 წლის 31 დეკემბრიდან საქართველოს ბაზარზე არსებული ყველა დასახელების თამბაქოს ნაწარმის შეფუთვაზე ბრენდის სახელის და ნიშნის დატანა იკრძალება. BAG-ის მიერ შემუშავებული კანონპროექტით, მისი 2025 წლის პირველ იანვრამდე გადავადება იყო განსაზღვრული.
