384 790 ევრო ერთ ავტობისში. ეს გადაწყვეტილება ბათუმის მერიამ მას შემდეგ მიიღო, რაც დონორი ორგანიზაციებისგან დაპირბეული სესხი და გრანტი მიიღო.
„ბათუმის ავტოტრანსპორტის“ ინფორმაციით, 8 ახალ ელექტროავტობუსს 2020 წლის მაისში მიიღებენ. ავტობუსის სიგრძე 10 მეტრი იქნება.
ელექტროავტობუსების შესყიდვაზე შპს „ბათუმის ავტოტრანსპორტსა“ და ბელორუსულ კომპანია „ბელკომუნამაშს“ შორის ხელშეკრულება 2019 წლის 10 სექტემბერს გაფორმდა. ხელშეკრულების საერთო ღირებულება 3 392 093 ევროა.
ამ თანხაში შედის ელექტროავტობუსების დასამუხტი მოწყობილობის შეძენაც, რაც ავტობუსების მომწოდებელმა კომპანიამ უნდა უზრუნველყოს. მანვე უნდა დაამონტაჟოს ეს მოწყობილობა „ბათუმის ავტოტრანსპორტის“ ტერიტორიაზე, უნდა მოაგვაროს ელექტროენერგიის სიმძლავრესთან დაკავშირებული საკითხები „ენერგო-პრო ჯორჯიასთან“ და უზრუნველყოს მოწყობილობის ექსპლუატაციაში გაშვება. ამ ყველაფრისთვის კი, 273 129 ევროა გათვალისწინებული.
„ბათუმის ავტოტრანსპორტის“ ინფორმაციით, ხელშეკრულების საერთო ღირებულებაში შედის 25 783 ევრო – აუცილებელი სათადარიგო ნაწილებისთვის და 14 850 ევრო – ელექტროავტობუსების სადიაგნოსტიკო აპარატურის მოწოდებისთვის.
რაც შეეხება სამარშრუტო ხაზს, თუ სად იმოძრავებენ ახალი ელექტროავტობუსები, „ბათუმის ავტოტრანსპორტის“ ინფორმაციით, „ამ ეტაპზე მიმდინარეობს მარკეტინგის განყოფილების მიერ მარშრუტებზე კვლევები, მოქალაქეების გამოკითხვა და უახლოეს მომავალში ბათუმის მერიის თანხმობის შესაბამისად დადგინდება შესაბამისი მარშრუტი“.
„ავტოტრანსპორტში“ ჯერ კიდევ არ არიან ჩამოყალიბებული, თუ რა ფერის იქნება ახალი ელექტროავტობუსები. ბათუმში ავტობუსების მიღებას აპრილში ვარაუდობდნენ, თუმცა, „ავტოტრანსპორტისგან“ მიღებული ბოლო ინფორმაციით, ავტობუსებს მაისში მიიღებენ. ხელშეკრულებით კი, მომწოდებელს ვადა 2020 წლის ივლისამდე აქვს.
ბათუმის მერიის ინფორმაციით, ელექტროავტობუსების პროექტისთვის 3 მილიონ 777 ათასი ევრო დაიხარჯება: „აღმოსავლეთ ევროპის ენერგოეფექტურობისა და გარემოს დაცვის პარტნიორობის (E5P) ფონდმა, რომლის უმსხვილესი დონორები არიან ევროკავშირი და შვედეთი, 1 მილიონ 500 ათასი ევრო გრანტის სახით გამოყო, დარჩენილი თანხა კი, EBRD-ის შეღავათიანი სესხია“.
შეგახსენებთ, ბათუმის მუნიციპალიტეტის ავტოპარკი ბოლო პერიოდში 40 ახალი ავტობუსით განახლდა. „ბათუმის ავტოტრანსპორტის“ დამფუძნებელი და 100%-იანი წილის მფლობელი ბათუმის მერიაა.
წყარო: "ბათუმელები"
ბელა გელაშვილი
ავტორი