საქართველოს საბანკო სისტემაში შემცირებულია სარგებელი დეპოზიტებზე. ამის შესახებ ირკვევა კომერციული ბანკების მიერ ეროვნული ბანკისთვის წარდგენილი ფინანსური მაჩვენებლებიდან, რომლის მიხედვით, მარტში, წინა თვესთან შედარებით, ის 0.9 პროცენტული პუნქტით შემცირდა და 5.6% შეადგინა, რაც ძირითადად სავალუტო დეპოზიტების განაკვეთის შემცირებას უკავშირდება.
დეპოზიტების განაკვეთების ცვლილება ასეთია:
● იურიდიული პირების ლარის დეპოზიტების საშუალო საბაზრო სარგებელი - 8.2%, მატება წინა თვესთან 0.1 პროცენტული პუნქტი;
● ფიზიკური პირების ლარის დეპოზიტების საშუალო საბაზრო სარგებელი - 17.9%, ზრდა წინა თვესთან 0.9 პროცენტული პუნქტი;
● იურიდიული პირების სავალუტო დეპოზიტების საშუალო საბაზრო სარგებელი - 2.3%, კლება 0.3 პროცენტული პუნქტი;
● ფიზიკური პირების სავალუტო დეპოზიტების საშუალო საბაზრო სარგებელი - 1.4%, კლება წინა თვესთან შედარებით 0.4 პროცენტული პუნქტი.
საბანკო სექტორში ₾36 მლრდ-ისფიზიკური და იურიდიული პირების დეპოზიტებია (ბანკების დეპოზიტების გარეშე), მათ შორის 19 მლრდ ლარის საცალო (ეროვნულ ვალუტაში - 4.5 მლრდ ლარი, უცხოურ ვალუტაში - 14. 4 მლრდ ლარის ეკვივალენტი), ხოლო იურიდიული პირების - 18 მლრდ ლარამდე (ეროვნულ ვალუტაში - 9.4 მლრდ, უცხოურ ვალუტაში - 8.4 მლრდ ლარის ეკვივალენტი).
2021 წლის პირველი აპრილისათვის საბანკო სექტორში განთავსებული არასაბანკო დეპოზიტების მოცულობამ 36.03 მლრდ ლარი შეადგინა, რაც 9.69 მლნ ლარით, ანუ 0.03%-ით მეტია პირველი მარტისათვის არსებულ მაჩვენებელზე (გაცვლითი კურსის ეფექტის გარეშე 1.28%-ით ნაკლები). უცხოური ვალუტით განთავსებულ დეპოზიტებში აშშ დოლარის წილმა 84.64%, ხოლო ევროს წილმა 13.86% შეადგინა.
მარტში, წინა თვესთან შედარებით, ადგილი ჰქონდა ვადიანი დეპოზიტების შემცირებას 534.93 მლნ ლარით, ანუ 3.13%-ით (გაცვლითი კურსის ეფექტის გარეშე 4.47%-ით შემცირდა). მოთხოვნამდე დეპოზიტები 544.62 მლნ ლარით, ანუ 2.88%-ით გაიზარდა (გაცვლითი კურსის ეფექტის გარეშე გაიზარდა 1.59%-ით).
დეპოზიტების ლარიზაციის კოეფიციენტმა მიმდინარე წლის პირველი აპრილისათვის 36.36% შეადგინა. პირველი მარტის მდგომარეობასთან შედარებით, დეპოზიტების ლარიზაცია შემცირდა 2.00% პუნქტით (გაცვლითი კურსის ეფექტის გამორიცხვით შემცირდა 1.52 პროცენტული პუნქტით).
მარტში ვადიან დეპოზიტებზე საშუალო წლიურმა შეწონილმა საბაზრო საპროცენტო განაკვეთმა 5.56% შეადგინა, მათ შორის ეროვნული ვალუტით განთავსებულ დეპოზიტებზე 8.36%, ხოლო უცხოური ვალუტით განთავსებულ დეპოზიტებზე 1.43%.