ივლისში საქართველოს ეკონომიკა 5.5%-ით შემცირდა, ხოლო 2020 წლის პირველ 7 თვეში ეკონომიკის ვარდნამ 5.8 % შეადგინა. ამის შესახებ დღეს საქსტატის პრეზიდენტმა გოგიტა თოდრაძემ ბრიფინგზე განაცხადა.
საქსტატის ანგარიშიდან ირკვევა, ივლისში დღგ-ის გადამხდელი საწარმოების ჯამურმა ბრუნვამ 7.2 მილიარდ ლარს მიაღწია, რაც გასული წლის შესაბამის პერიოდთან შედარებით 3.9 %-ით არის შემცირებული.
დღგ-ის გადამხდელ საწარმოთა ბრუნვის რეკორდული შემცირება აპრილში დაფიქსირდა, როცა ბრუნვის მოცულობა 4.2 მლრდ ლარამდე, 32.8 %-ით, დაეცა, მაისში ბრუნვა 5.4 მლრდ ლარამდე, 22.2 %-ით, შემცირდა, ივნისში კლება - 6.2 %-ამდე იყო და საწარმოთა ბრუნვა 6.5 მლრდ ლარს გაუტოლდა.
ცნობისთვის, სტატისტიკის ეროვნული სამსახური დღგ-ის გადამხდელი საწარმოების ბრუნვების, ფისკალური და მონეტარული მონაცემების საფუძველზე ყოველთვიურად აწარმოებს ეკონომიკის ზრდის ყოველთვიურ წინასწარ შეფასებებს.
ბელა გელაშვილი
ავტორი