ევროპის რეკონსტრუქციისა და განვითარების ბანკი (EBRD), სურსათისა და სოფლის მეურნეობის ორგანიზაცია (FAO) ქართული ტურიზმის მხარდასაჭერად ახალი ინიციატივით გამოდიან.
ინიციატივა გულისხმობს აგროტურიზმი და ტრადიციული ქართული აგროპროდუქტები ტურისტების მოზიდვას.
გაერო-ს სურსათისა და სოფლის მეურნეობის ორგანიზაციის განმარტებით, კორონავირუსით გამოწვეულმა პანდემიამ თითქმის სრულად გააჩერა გლობალური ტურიზმი, რასაც მძიმე ეკონომიკური კრიზისი, სამუშაო ადგილების შემცირება და დაკარგვა მოჰყვა. თუმცა, ამავდროულად, პანდემიამ მსოფლიოს შესაძლებლობა მისცა, გადაეფასებინა ტურიზმის ინდუსტრია, რათა მომავალში ტურიზმი მეტად უსაფრთხო, პასუხისმგებლიანი და ჩვენი პლანეტისთვის უფრო მეგობრული გახდეს.
FAO-ს ტურიზმის ინდუსტრიის გადააზრების კონცეფციის ნაწილია ქართული აგროტურიზმი, რომელსაც, ორგანიზაციის შეფასებით, პოტენციალი აქვს, გახდეს ის მთავარი მამოძრავებელი ძალა, რომელსაც ინდუსტრიის განახლება და კრიზისიდან გამოყვანა შეეძლება.
აგროტურიზმის მიმართულებით ევროპის რეკონსტრუქციისა და განვითარების ბანკის (EBRD), სურსათისა და სოფლის მეურნეობის ორგანიზაციის (FAO) ერთობლივი, ახალი, ინიციატივა განსაკუთრებულ ყურადღებას ამახვილებს ავთენტურ ქართულ პროდუქტებზე, რომელთა დაგემოვნება შესაძლებელია მხოლოდ ლოკალურად და რომელთა თვისებებს საქართველოს კონკრეტული რეგიონებისთვის დამახასიათებელი გარემოებები – მცენარეები, ცხოველები, კლიმატი, ნიადაგი და კულინარიული ტრადიციები განსაზღვრავენ. მაგალითისთვის, ამგვარი უნიკალური პროდუქტია თუშური გუდა, რომელიც საუკუნოვანი ტრადიციული ქართული მეთოდითა და მხოლოდ ადგილობრივი სახეობის ცხვრისგან მიღებული რძით მზადდება.
„ინიციატივის ფარგლებშივე, ევროპის რეკონსტრუქციისა და განვითარების ბანკი და სურსათისა და სოფლის მეურნეობის ორგანიზაცია ადგილობრივ, მცირე ზომის, თუმცა მაღალი ხარისხის პროდუქციის მწარმოებლებს დაეხმარებიან ისეთი ახალი ბაზრების ათვისებაში, როგორებიცაა ადგილობრივი სასტუმროები, რესტორნები და კაფეები. აღნიშნული ინიციატივა EBRD/FAO-ს, უკვე განხორციელებულ, გეოგრაფიული აღნიშვნების (GI) პროექტს ეფუძნება. GI არის ეტიკეტი, რომელიც ქართულ, უნიკალურ პროდუქტს ენიჭება. მისი, როგორც სამარკო ნიშნის გამოყენება, საქართველოს საშუალებას მისცემს ფალსიფიცირებისგან დაიცვას ისეთი პროდუქტები როგორიცაა: სულგუნი, ჩეჩილი ყველი ან ჩურჩხელა. გეოგრაფიული აღნიშვნები, როგორც პროდუქტებისთვის მინიჭებული მაღალი ხარისხის სიმბოლო, მნიშვნელოვნად ზრდის ადგილობრივ დონეზე წარმოებული პროდუქტების ღირებულებას და მწარმოებელი ფერმერების შემოსავლებს. ასევე, ათავსებს საქართველოს მსოფლიო აგროტურიზმის რუკაზე. მდგრადი აგროტურიზმი ერთი მხრივ, მცირე ბიზნესოპერატორებს დაეხმარება, გახდნენ უფრო მედეგები კრიზისების მიმართ, ხოლო მეორეს მხრივ, გააძლიერებს ქართულ ტრადიციულ სასურსათო წარმოებას. ევროპის რეკონსტრუქციისა და განვითარების ბანკისა და სურსათისა და სოფლის მეურნეობის ორგანიზაციის ახალი პროექტი განხორციელდება საქართველოს სოფლის მეურნეობისა და გარემოს დავის სამინისტროსთან, WWF კავკასიასთან, ელკანასთან, Slow Food-თან, საქართველოს ფერმერთა ასოციაციასთან და საქართველოს ტურიზმის ეროვნულ ადმინისტრაციასთან ერთად“, – განმარტავს გაერო-ს სურსათისა და სოფლის მეურნეობის ორგანიზაცია.
ბელა გელაშვილი
ავტორი