2019 წელს საქართველოში ელექტროენერგიის იმპორტი წინა წელთან შედარებით 7.8%-ით გაიზარდა და 6.7-ჯერ გადააჭარბა ექსპორტს.
როგორც საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) 2019 წლის საქმიანობის ანგარიშშია აღნიშნული, 2019 წელს ელექტროენერგიის იმპორტის 68% თურქეთიდან განხორციელდა, იმპორტირებული ელექტროენერგიის 32% კი რუსეთზე მოდის.
ელექტროენერგიის ექსპორტის მნიშვნელოვანი ნაწილი (46%) განხორციელდა თურქეთში, რუსეთში – 24%, სომხეთში – 24%, ხოლო 5% – აზერბაიჯანში.
ცნობისთვის, იმპორტის მნიშვნელოვანი რაოდენობა წინა წლებში (2017 წელს 61% და 2018 წელს 82%) აზერბაიჯანიდან ხორციელდებოდა.
სემეკის მიხედვით, 2019 წელს ელექტროენერგიის იმპორტმა 1,627 მლნ.კვტ.სთ შეადგინა, რაც წინა წლის მაჩვენებელზე 7.8%-ით მეტია, ხოლო 2017 წლის მაჩვენებელზე – 8.7%-ით მეტი.
რაც შეეხება ექსპორტს, 2019 წელს საქართველოდან ექსპორტირებულ იქნა 243 მლნ.კვტ.სთ ელექტროენერგია, რაც წინა წლის მაჩვენებელზე 2.5-ჯერ ნაკლებია. როგორც საანგარიშო წელს, ისე წინა წლებში, უმეტესი ნაწილი ხორციელდება თურქეთში.
სემეკის ინფორმაციით, 2019 წელს ელექტროენერგიის წარმოება წინა წელთან შედარებით 2.6%-ით შემცირდა. სემეკის ინფორმაციით, 2010-2019 წლების მონაცემებზე დაყრდნობით, ყოველწლიურად საქართველოში ელექტროენერგიის წარმოება საშუალოდ 3.6%-ით, ხოლო შიდა მოხმარება 4.4%-ით იზრდება .
ბელა გელაშვილი
ავტორი