ევროპაში გაზის ფასი გასული სავაჭრო დღის განმავლობაში 17,5%-ით გაიზარდა და ათას კუბურ მეტრზე 950 აშშ დოლარს გადააჭარბა. ამას მოწმობს ICE Futures-ის მონაცემები.
დღის ბოლოს, ნიდერლანდებში TTF-ის ჰაბში გაზის დეკემბრის ფიუჩერსების ღირებულება 952,5 აშშ დოლარამდე გაიზარდა. ხოლო, სავაჭრო დღის განმავლობაში მაქსიმალურმა სავაჭრო პიკმა 960 აშშ დოლარს მიაღწია.
ევროპაში გაზის ფასი ბოლო თვეებში მკვეთრად გაიზარდა. ჯერ კიდევ აგვისტოს დასაწყისში, ნიდერლანდების TTF-ის ჰაბში ათასი კუბური მეტრი გაზი 515 აშშ დოლარად ივაჭრებოდა, სექტემბრის ბოლოსთვის ეს მაჩვენებელი გაორმაგდა.
Financial Times-ის ცნობით, გაზზე ფასის ზრდის ერთ-ერთ მიზეზად დასახელდა ის გარემოება, რომ "გაზპრომმა" უარი თქვა უკრაინის გავლით დამატებითი მოცულობების მიწოდებაზე, რომელიც ევროპაში ექსპორტის გაზრდას ისახავდა მიზნად.
რუსეთის პრეზიდენტის, ვლადიმერ პუტინის განცხადებით, "გაზპრომი" ევროპელი მომხმარებლების წინაშე საკონტრაქტო ვალდებულებებს შეასრულებს და ევროპის ენერგეტიკული ბაზრისთვის უფრო ხელსაყრელ ვითარებას შექმნის.
