ევროპაში გაზისა და ელექტროენერგიის უკიდურესად მაღალი ფასების გამო, შესაძლოა, მილიონობით ადამიანი გაღარიბდეს. ამის შესახებ ჩეხური გამოცემა წერს.
გამოცემა აღნიშნავს, რომ ბევრი ოჯახი კომუნალურების გადასახადებს ვერ გადაიხდის.
ევროკავშირის კომისარმა სამუშაოსა და სოციალური უფლებების საკითხებში, ნიკოლას შმიდტმა განაცხადა, რომ ევროპაში ენერგეტიკული კრიზისი სავარაუდოდ 2022 წლის გაზაფხულამდე გაგრძელდება.
ზოგიერთი ქვეყანა მხარს უჭერს ელექტროენერგიის გადასახადის გაუქმებას ევროკავშირში, მაგრამ ბრიუსელი ამ წინადადებას არ ემხრობა.
გამოცემა აღნიშნავს, რომ ელექტროენერგიისა და გაზის ფასი 2021 წლის დასაწყისიდან 400%-ზე მეტით გაიზარდა. ამას დაემატა ნავთობის ფასების მკვეთრი ზრდა - ოქტომბრის შუა რიცხვებში, Brent-ის ფასი ბარელზე 85 დოლარზე მაღლა ავიდა.
ევროკომისია ევროკავშირის წევრი ქვეყნების მთავრობებს მოუწოდებს, დაეხმარონ მოსახლეობის ყველაზე დაუცველ ჯგუფებს საგადასახადო შეღავათებით. ჩეხეთის მთავრობამ მოითხოვა ელექტროენერგიის გადასახადების სრული გაუქმება კრიზისის მოგვარებამდე. მაგრამ ბრიუსელი მხარს არ უჭერს ინიციატივას.
საფრანგეთს ასევე არ სურს გაზისა და ნახშირის გადასახადების გაუქმება ან შემცირება. როგორც საფრანგეთის ფინანსთა მინისტრმა ბრუნო ლე მაირმა თქვა, მთავრობამ უნდა დაუჭიროს მხარი ხალხს, მაგრამ არ არის საჭირო საფასურის შემცირება.
