ღვინის ეროვნული სააგენტოს მონაცემებით, მიმდინარე წლის იანვარ-თებერვალში საქართველოდან მსოფლიოს 39 ქვეყანაში 12,1 მლნ ბოთლი (0,75 ლ) ღვინოა ექსპორტირებული,
ექსპორტირებული ღვინის ღირებულება 31 მლნ აშშ დოლარია, რაც 2019 წლის იანვარ-თებერვლის ანალოგიურ მაჩვენებელს შვიდი პროცენტით აღემატება.
ექსპორტიორი ქვეყნების ხუთეულშია რუსეთი – 7.585.000 ბოთლი (-13%), უკრაინა – 1.314.750 ბოთლი (+35%), პოლონეთი – 1.1103.84 ბოთლი (+77%), ჩინეთი – 562.664 ბოთლი (-6%) და ყაზახეთი – 274.068 ბოთლი (-21%).
ორი თვის მონაცემებით, ექსპორტის ზრდა ფიქსირდება ევროპის ქვეყნების მიმართულებით: ლატვია – 230.730 ბოთლი (+30%), გერმანია – 150.862 ბოთლი (+53%), ლიტვა – 115.992 ბოთლი (+11%), ესტონეთი – 97.326 ბოთლი (+29%), შოტლანდია – 53.124 ბოთლი (100%), დიდი ბრიტანეთი – 35.046 ბოთლი (+349%), ნიდერლანდები – 21.006 ბოთლი (2593%) და ა.შ. ასევე აღსანიშნავია იაპონია – 16.512 ბოთლი (+86%), კანადა – 40.740 ბოთლი (+5%), ბელარუსი – 146.598 ბოთლი (+82%), მოლდოვა – 32.988 ბოთლი (+16%), სამხრეთ კორეა – 26.700 ბოთლი (+100%) და სხვა.
წლის დასაწყისში ღვინის, ბრენდი, ჭაჭის, საბრენდე სპირტისა და ჩამოსასხმელი ბრენდის ექსპორტი 140-მა კომპანიამ განახორციელა. საანგარიშო პერიოდში 8,7 მლნ აშშ დოლარის ღირებულების 4,25 მლნ ბოთლი ბრენდია ექსპორტირებული (ზრდა 1%) და 272 ათასი აშშ დოლარის ღირებულების 102 ათასი ბოთლი ჭაჭა (ზრდა 20%).
როგორც ღვინის სააგენტოში აღნიშნავენ, მთლიანობაში ღვინის, ბრენდის, ჭაჭის, საბრენდე სპირტისა და ჩამოსასხმელი ბრენდის ექსპორტის შედეგად მიღებულია 46,8 მლნ აშშ დოლარი, რაც შვიდი პროცენტით აღემატება გასული წლის ამავე პერიოდის მაჩვენებელს.
"სააგენტოს ინფორმაციით, ექსპორტის ზრდის კარგი ტენდენცია დაფიქსირდა ევროპის ქვეყნების, ასევე იაპონიისა და კანადის მიმართულებით. სტაბილურია ასევე ბრენდისა და ჭაჭის ექსპორტი. რაც ყველაზე მნიშვნელოვანია, ღვინის ღირებულების ზრდის პროცენტული მაჩვენებელი აღემატება რაოდენობრივ მაჩვენებელს, რაც მიუთითებს, რომ ქართული ღვინის ფასი ინარჩუნებს ზრდის ტენდენციას," - აღნიშნავს ღვინის ეროვნული სააგენტოს თავმჯდომარე, ლევან მეხუზლა.
ცოტა ხნის წინ სოფლის მეურნეობის მინისტრის მოადგილე, ხატია წილოსანი ამბობდა, რომ, კორონავირუსის გამო, წინა წელთან შედარებით, ჩინეთში ქართული ღვინის ექსპორტი 6%-ით შემცირდა, თუმცა დასძენდა, რომ ღვინის ექსპორტი მზარდია ევროპისა და ამერიკის ბაზარზე.
შეგახსენებთ, გასულ წელს ექსპორტირებული იყო დამოუკიდებელი საქართველოს ისტორიაში რეკორდული რაოდენობის 94 მლნ-მდე ბოთლი ღვინო, რეკორდული იყო გაყიდვების მაჩვენებელიც, რომელმაც 240 მლნ აშშ დოლარს მიაღწია, რაც 2018 წლის ანალოგიურ მონაცემზე 17 პროცენტით მეტია.
ბელა გელაშვილი
ავტორი