გიდები დაუღალავად შრომობენ და დიდი კონტრიბუცია შეაქვთ ტურისტულ ინდუსტრიაში, თუმცა, სამწუხაროდ, ეს სფერო ბოლომდე აღრიცხული არ არის, – ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა.
მისი თქმით, ამ სფეროში დასარეგულირებელია ხარისხის სტანდარტები, რაც თავად გიდების მოთხოვნაც არის.
„საბედნიეროდ, ამ სფეროში არსებობენ საკმაოდ კარგად ჩამოყალიბებული და ორგანიზებული პროფესიული ასოციაციები, გიდების ასოციაციები, რომლებთანაც ახლა დავიწყეთ თანამშრომლობა, განსაკუთრებით ანტიკრიზისული გეგმის მომზადების პერიოდში. გუშინაც საკმაოდ ხანგრძლივი ონლაინდისკუსია გვქონდა გიდების ასოციაციასთან და გიდების წარმომადგენლებთან. არის მთელი რიგი საკითხები, რაზეც ჩვენ უნდა ვიმუშაოთ. გაცილებით მარტივია, მივიღოთ გადაწყვეტილება იგივე სასტუმრო ინდუსტრიაზე ან ტურისტულ კომპანიებზე, რომლებიც მეტად ინსტიტუციონალიზებული, ლეგალიზებული და კარგად აღრიცხული სფეროა, გადასახადის გადამხდელი არიან და ვიცით, რომ შეღავათი კონკრეტულ გადასახადთან შეიძლება იყოს დაკავშირებული“, – განაცხადა ეკონომიკის მინისტრმა.
მისი თქმით, შეთანხმდა, რომ გიდებთან დაკავშირებით რამდენიმე მიმართულებით წარიმართება მუშაობა, არა მხოლოდ გადამზადებაზე.
მინისტრმა გიდების დასახმარებლად მიღებულ გადაწყვეტილებებზეც ისაუბრა.
„რა თქმა უნდა, ხარისხის სერტიფიცირება ერთ-ერთი მთავარია, რაც ალბათ, ნებაყოფლობითი იქნება და თვითონ ასოციაციები გახდებიან ჩვენი თანამოაზრეები ამ საკითხში, ასევე არის მათი აღრიცხვის საკითხი. ჩვენ ზუსტად უნდა ვიცოდეთ, ვინ არის ეს ჯგუფი, ვის უნდა მივანიჭოთ გარკვეული პრეფერენციები და დახმარებები.
ასევე უკვე მიღებულია გადაწყვეტილება, რომ გიდებს მიეცემათ უფასო შესვლის უფლება მუზეუმებში, ნაკრძალებში, დაცულ ტერიტორიებზე, რაც მათთვის ძალიან მნიშვნელოვანი შეღავათია, ასევე იმ პერიოდში, ვიდრე არ აღდგება ტურისტული აქტივობა ძველი მასშტაბით და ჯერ კიდევ იქნება პრობლემა გიდების დასაქმების, ჩვენ ყველაფერს გავაკეთებთ, რათა მათთვის ალტერნატიული დასაქმების შესაძლებლობა შევქმნათ“, – განაცხადა ეკონომიკის მინისტრმა.
როგორც მან განმარტა, ამ მიზნით სპეციალური პლატფორმა შეიქმნება.
„აქტიურად ჩავრთავთ გიდებს მათ შორის მიკრო გრანტების პროგრამაში, იგივე „აწარმოე საქართველოს“ ფარგლებში, რომ შეძლონ თავიანთ საქმიანობასთან ახლოს მყოფი პროექტები წარადგინონ და ამაშიც ჩაერთონ, გადამზადება ამის ერთ-ერთი კომპონენტია“, – განაცხადა მინისტრმა და აღნიშნა, რომ მეტი დეტალი ახლო მომავალში დაზუსტდება, რადგან კონკრეტულად გიდებზე მორგებული პროგრამის შეთავაზებისთვის აღნიშნული სეგმენტის უკეთ შესწავლაა საჭირო, რასაც დამატებით დრო სჭირდება.
შეგახსენებთ, დღეს ტურიზმის ეროვნული ადმინისტრაციის ხელმძღვანელის, მარიამ ქვრივიშვილის თქმით, შესაძლებელია,აჭარა იყოს ერთ-ერთი იმ ოფციებს შორის, რომელიც იქნება დამატებით მწვანე ზონად დაპოზიციონირებული.
ცნობისთვის, აჭარას, ისევე, როგორც სხვა ტურისტულ ადგილებს საერთაშორისო ვიზიტორების მიღება 1-ელი ივლისიდან, ხოლო საქართველოს მოქალაქეების, 15 ივნისიდან შეეძლება.
დღეს ტურიზმის გახსნის გეგმის პრეზენტაციის მთავარი გზავნილი იყო, რომ საქართველო უსაფრთხო ტურისტული იმიჯით უნდა დაპოზიციონირდეს საერთაშორისო ტურიზმის ბაზარზე.
საქართველოში ტურიზმი სამ ეტაპად გაიხსნება.
ტურიზმში ახალი მოთხოვნები ჩნდება და მთავრობა ცდილობს ეკონომიკის ამ სეგმენტს შეუწყოს ხელი ამ მოთხოვნების დასაკმაყოფილებლად.
როგორც დღეს პრემიერმა გახარიამ განაცხადა, საქართველო უსაფრთხო ტურისტულ ზონებს გამოყოფს, როგორიცაა, წყალტუბო, გუდაური, საირმე, აბასთუმანი, ბორჯომი და სხვა.
მთავრობის მეთაურის თქმითვე, ჯანდაცვის სამინისტროს აქვს მიღებული დავალებები, რომ საზღვრებზე უნდა გაძლიერდეს თითოეული შემომსვლელი ადამიანის კონტროლი.
გახარიას ინფორმაციით, 15 ივნისიდან საქართველო გაიხსნება ადგილობრივი ტურიზმის სერვისებისმიწოდებისთვის,ხოლო პირველი ივლისიდან კი, საქართველო იქნება მზად იმისთვის, რომ მიიღოს უცხოური ტურისტები.
დღესვე ცნობილი გახდა, რომ გიდებისთვის მთავრობა ცალკე სპეციფიკურ პროგრამას ამუშავებს, რომელიც სულ მალე გასაჯაროვდება.
ტურიზმის გახსნის პროგრამის პრეზენტაციაზე გაცხადდა, რომ მთავრობა საბანკო გარანტიის პროცენტს ტურისტულ კომპანიებს 6 თვე დაუსუბსიდირებს.
ეკონომიკის მინისტრის ინფორმაციით, სასტუმროების სესხების სუბსიდირებისთვის მთავრობას 60 მილიონი ლარი აქვს გამოყოფილი.
მთავრობის გადაწყვეტილებითვე, გადასახადები 6 118-მა ტურისტულ ბიზნესს გადაუვადდა.
კერძოდ, მთავრობის გადაწყვეტილებით, ტურინდუსტრიის კომპანიებს საშემოსავლო გადასახადი წლის ბოლომდე გადაუვადდებათ.
პრემიერ-მინისტრის თქმით, ტურიზმის სექტორი სრულად გათავისუფლდა ქონების გადასახადისგან.
პოსტკრიზისული გეგმის ფარგლებში, სარესტორნე ბიზნესის ახალ სესხებს მთავრობა 90%-ით თანაუზრუნველყოფს, ხოლო უკვე არსებული სესხების რესტრუქტურიზაციის დროს სარესტორნე ბიზნესს სახელმწიფო 30%-ის თანაუზრუნველყოფაში დაეხმარება.
მთავრობა სესხებს უსუბსიდირებს სასტუმროების ნაწილსაც.კერძოდ, ყველა სასტუმროს, რომლის წლიური ბრუნვაც 20 მილიონ ლარამდე იყო, დაუსუბსიდირებათ საბანკო სესხის პროცენტის 80%-ს სესხის პირველ 5 მილიონ ლარზე.
დღესვე ტურიზმის ადმინისტრაციის ხელმძღვანელის, მარიამ ქვრივიშვლის თქმით, ტურიზმის ყველა სეგმენტისთვის მთავრობა განსხვავებულ გაიდლაინებს შეიმუშავებს.
მისივე თქმით, აჭარა მწვანე ზონად დაპოზიციონირდება.
ტურიზმის სტიმულირებისთვის, მთავრობა საავიაციო პოლიტიკას ახალ რეალობას მოარგებს.
ეკონომიკის მინისტრი ქვეყანაში უპირველესად რეგიონის ტურისტებს ელოდება, თუმცა მთავრობა ევროპელი ტურისტების მოსაზიდადაც აქტიურად იმუშავებს. ეკონომიკის მინისტრის თქმით, ამ ეტაპზე რუსეთთან რაიმე მოლაპარაკებები არ მიმდინარეობს, თუმცა ქვეყანა, უსაფრთხოების ზომების დაცვით, მზად არის, რუსი ტურისტებიც მიიღოს და უმასპინძლოს.
თურნავას პროგნოზით, მარტივი იქნება აღდგეს ფრენები იმ ტრადიციული მიმართულებებით, რომელიც აქამდე გვქონდა და მოლაპარაკებები როგორც ავიაკომპანიებთან, ისე ქვეყნის მთავრობებთან უკვე აქტიურად მიმდინარეობს.
შეგახსენებთ, დღესვე ცნობილი გახდა, რომ 11 მაისიდან ყველა სახის წარმოება და ყველა მაღაზია გაიხსნება, გარდა ფეხსაცმლისა და ტანსაცმლისა.
ცნობისთვის, 10 დღის განმავლობაში 4 სექტორის მხარდაჭერის გეგმა გასაჯაროვდება. ესაა: ტურიზმი, სოფელი, მშენებლობა და განათლება.
ბელა გელაშვილი
ავტორი