ჰაწვალის განახლებული საბაგიროს მოწყობა მთავრობას 34 793 887 ლარი დაუჯდება. შესაბამისი განცხადება სახელმწიფო შესყიდვების სააგენტოს ვებგვერდზე. გამოქვეყნდა.
საქართველოს მთავრობის განკარგულებით, შპს „ემთიეის“ (ყოფილი „მთის კურორტების განვითარების კომპანია“) დაევალა ჰაწვალი - ზურულდის დაზიანებული საბაგირო გზის დემონტაჟი და მის ადგილას ახალი საბაგირო გზისა და შესაბამისი ინფრასტრუქტურის მოწყობა, მისი გამშვები სისტემებითა და მასთან დაკავშირებული მოწყობილობებით აღჭურვა არაუგვიანეს 2021 წლის 31 დეკემბრისა.
“ჰაწვალი-ზურულდის საბაგიროს დემონტაჟისა და მის მაგივრად ახალი საბაგიროს (საჭირო ინფრასტრუქტურასთან ერთად) მოწყობისათვის აუცილებელი საქონლის, სამუშაოებისა და მომსახურების შესყიდვას შპს „ემ თი ეი“ გეგმავს ავსტრიული კომპანია „Doppelmayer”-ისა და შპს „დოპელმაიერ საუს კაუკაზუსისგან“ ერთობლივად. ამ მიმწოდებლებისაგან მოწოდებული ფასის მიხედვით, ჰაწვალი-ზურულდის არსებული დაზიანებული საბაგირო გზის დემონტაჟისა და მის ადგილას ახალი საბაგიროსა და შესაბამისი ინფრასტრუქტურის მოსაწყობად და მისი ექსპლუატაციაში გაშვებისთვის საჭირო საქონლის, მომსახურებისა და სამუშაოების საერთო ღირებულება - დაახლოებით შეადგენს 34 793 887 ლარს (დამატებითი ღირებულების გადასახადის ჩათვლით), რომელიც №1362 (06.08.2021) განკარგულების შესაბამისად, 6 850 000 ლარის (მათ შორის დღგ-ს თანხა 1 000 000 ლარი) ნაწილში დაფინანსდება შპს „ემ თი ეისთვის“ „საქართველოს 2021 წლის სახელმწიფო ბიუჯეტის შესახებ“ საქართველოს კანონით გამოყოფილი ასიგნებებით, ხოლო დანარჩენ ნაწილში (27 943 887 ლარი) - „საქართველოს 2022 წლის სახელმწიფო ბიუჯეტის შესახებ“ საქართველოს კანონით გათვალისწინებული თანხებით,”- ნათქვამია სახელმწიფო შესყიდვების სააგენტოს ვებგვერდზე.
