კომერციულ ბანკებში 1 ამერიკული დოლარის ღირებულებამ 3 ლარს გადააჭარბა.
ამ დროისათვის, „თიბისი ბანკში“ 1 აშშ დოლარის შეძენა მოქალაქეებს 3.0050 ლარად, ხოლო მისი გაყიდვა - 2.9250 ლარად შეუძლიათ;
„საქართველოს ბანკში“ 1 ამერიკული დოლარის ყიდვა 3.005 ლარად, მისი გაყიდვა კი 2.915 ლარად არის შესაძლებელი;
„ვითიბი ბანკში“ 1 დოლარის ყიდვას მოქალაქეები ასევე 3,0050 ლარად, მის გაყიდვას კი 2,9250 ლარად შეძლებენ;
„ტერა ბანკში“ 1 აშშ დოლარის ღირებულება 3.0050 ლარია; მისი ჩაბარება კი მოქალაქეებს 2.9150 ლარად შეუძლიათ;
მოქალაქეებს 1 აშშ დოლარის შეძენა 3.0150 ლარად შეუძლიათ „პროკრედიტ ბანკში“, „ქართუ ბანკში“ კი მისი ღირებულება 2.9900 ლარია.
შეგახსენებთ, რომ ეროვნული ბანკის მიერ გუშინ გამოქვეყნებული მონაცემების თანახმად, 1 აშშ დოლარის ღირებულებამ 2.9808 ლარი შეადგინა. რაც შეეხება ევროს, მისი კურსი 3.2571 ლარია. აღსანიშნავია, ისიც რომ ეროვნულმა ბანკმა გუშინ განცხადება გაავრცელა და აღნიშნა, რომ დღეს, სავალუტო აუქციონზე 40 მილიონ აშშ დოლარს გაყიდის.
„ნომინალური ეფექტური გაცვლითი კურსის არსებული დონე კვლავ მნიშვნელოვან ინფლაციურ ზეწოლას ქმნის. ამ ზეწოლის გასანეიტრალებლად, საქართველოს ეროვნულმა ბანკმა ა.წ. 25 სექტემბერს რეფინანსირების განაკვეთი 0.5 პროცენტული პუნქტით გაზარდა. გამკაცრებული მონეტარული პოლიტიკის ზემოქმედების გასაძლიერებლად, ეროვნული ბანკი ხვალ, 27 სექტემბერს, სავალუტო აუქციონზე 40 მილიონ აშშ დოლარს გაყიდის,“-აღნიშნულია სებ-ის განცხადებაში.
ეროვნული ბანკი ახალ კურსს დღეს 17:00 საათზე გამოაქვეყნებს.
გუშინ ლარმა ახალი ისტორიული მინიმუმი დააფიქსირა - სებ-ის ოფიციალური კურსით დღეს ერთი დოლარი 2,98 ლარი ღირს. ბოლო ერთი წლის განმავლობაში კი ეროვნული ვალუტა 37 პუნქტით, 14,1%-ით გაუფასურდა (2,61დან 2,98-მდე). მართალია ამ პერიოდის განმავლობაში ქვეყნის მთავარმა ბანკმა მონეტარული პოლიტიკის განაკვეთი რამდენჯერმე გაზარდა, თუმცა ლარი არ გამყარებულა. პირიქით, 25 სექტემბრის შემდეგ, როდესაც განაკვეთი კიდევ 0,5 პროცენტული პუნქტით გაიზარდა, ლარმა მორიგი მარცხი განიცადა და მეორე დღეს თითქმის 1,5 პუნქტით გაუფასურდა.
ბოლო მოვლენებიდან გამომდინარე აშკარაა, რომ ლარი „სენსიტიური“ მხოლოდ სებ-ის იმ განცხადების მიმართ არის, რომელიც შესაძლო სავალუტო ინტერვენციების განხორციელებას ეხება. სწორედ ასეთი განცხადებების შემდეგ ლარი Bloomberg-ის სავაჭრო პლატფორმაზე ფაქტობრივად, მყისიერად მყარდება, რაც შემდგომ ოფიციალურ კურსზეც აისახება.
- 2019 წლის 31 ივლისი - საქართველოს ეროვნულმა ბანკმა 40 მლნ დოლარის გაყიდვა დაანონსა
- 2019 წლის 31 ივლისს დადგენილი ოფიციალური კურსით ერთი დოლარი 2,97 ლარი იყო
- 2019 წლის 1-ელ აგვისტოს სავალურო აუქციონზე 32,8 მლნ დოლარი გაიყიდა და ერთი დოლარის ღირებულება 2,92 ლარი გახდა
- 2019 წლის 3 აგვისტოს ერთი დოლარი ოფიციალური კურსი 2,88 ლარი იყო
მაშინ ინტერვენციების განხორციელების გადაწყვეტილება ეროვნულმა ბანკმა მაშინ მიიღო, როდესაც ლარი 2-დღიან ინტერვალში თითქმის 4 პუნქტით - 2,93-დან 2,97 ნიშნულამდე გაუფასურდა. 1-ელ აგვისტოს განხორციელებული სავალუტო აუქციონის შემდეგ ლარმა გამყარება დაიწყო და უკვე 3 აგვისტოს ერთი დოლარი 2,88 ლარი გახდა.
თითქმის სამკვირიან პერიოდში ლარის ოფიციალური კურსი 2,88-2,93-ის კორიდორში ტრიალებდა. თუმცა მერე გაუფასურება დაიწყო და უკვე 3 სექტემბრიდან ერთი დოლარის ოფიციალური ღირებულება 2,96 ლარი გახდა. ამ დროის განმავლობაში სებ-ს სავალუტო ინტერვენცია არ განუხორციელებია, მხოლოდ მონეტარული პოლიტიკის განაკვეთი გაამკაცრა და თანაც ორჯერ - პირველად 4 სექტემბერს 0,5 პროცენტული პუნქტით, მეორედ კი 25 სექტემბრის რიგგარეშე სხდომაზე ისევ 0,5 პროცენტული პუნქტით. თუმცა ერთ თვეში მონეტარული პოლიტიკის ერთპროცენტიანი ზრდას ლარის კურსზე გავლენა არ მოუხდენია და პირიქით, გაუფასურდა კიდეც.
დღეს კი საქართველოს ეროვნული ბანკი აუქციონზე 40 მლნ დოლარს ისევ გამოტანს, რაც წინა პერიოდის ანალოგიურად შესაძლოა, ლარის კურსზე დადებითად აისახოს. თუმცა რამდენ დღეს გასტანს ინტერვენციების შედეგი ეროვნული ვალუტაზე, ცოტა რთული სათქმელია. 1-ლი აგვისტოს ინტერვენციების გავლენა მხოლოდ სამიოდე კვირა გაგრძელდა.
ბელა გელაშვილი
ავტორი