ხობის მუნიციპალიტეტის სოფელ ახალ ხიბულაში ლოკოკინების ფერმა „ნადი გრუპი“ სახელმწიფოს დახმარებით, „ერთიანი აგროპროექტის“ ფარგლებში აშენდა.
სოფლის მეურნეოების სამინისტროს ინფორმაციით, ფერმის ასაშენებლად ჯამურად 1.410.000 ლარის ინვესტიცია განხორციელდა, საიდანაც 1,260,000 ლარი ბენეფიციარმა შეღავათიანი აგროკრედიტით მიიღო.
ფერმა წელიწადში საშუალოდ 50 ტონა ლოკოკინას ხორცს აწარმოებს, პროდუქციის რეალიზაცია ხდება საექსპორტო ბაზრებზე, ძირითადად იტალიაში, იგეგმება ადგილობრივ ბაზარზე გასვლაც. საწარმოში 10 ადგილობრივი მცხოვრებია დასაქმებული.
Report.ge- მ გაარკვია, რომ თუ გასულ წელს ერთი კილოგრამი ლოკოკინის სარეალიზაციო ფასი 15 ლარიდან 25 ლარამდე მერყეობდა, წელს ერთი კილოგრამი მოლუსკის რეალიზება 40-50 ლარადაა შესაძლებელი. ადგილობრივი რესტორნების მხრიდან ლოკოკინებზე მოთხოვნა მაღალია.
აღმოჩნდა, რომ ლოკოკინები საკმაოდ რთული მოსავლელები არიან. Report. ge - ს "ნადი გრუპის" დამფუძნებელი, მერაბ ნადარაია, უყვება ისინი მუდმივ ყურადღებას საჭიროებენ.
"საჭმელი უნდათ, წყალი. მუდმივად საჭიროებენ შესაბამისი პირობებს: სიცხეში თავს მიწას აფარებენ, ღამე, სინესტესა და სიგრილეში კი იკვებებიან და მრავლდებიან. კვერცხს წელიწადში ორჯერ დებენ,თითო ლოკოკინა ერთ ჯერზე 30-50 კვერცხს დებს. კვერცხის დადებიდან ორ კვირაში ახალი მოლუსკი იჩეკება და 7-8 თვეში მისი მირთმევა უკვე შესაძლებელია. გასაყიდ ლოკოკინას რამდენიმე დღე მხოლოდ მარცვლეულით და წყალით ვკვებავთ, რომ კუჭ-ნაწლავი გასუფთავდეს. მერე გაიკეთებს აპკს და რეალიზაციისთვის მზად არის. დიდი მოთხოვნაა. საჯიშე ლოკოკინები იტალიიდან ჩამოვიყვანეთ. მის ექსპორტსა და გასაღებაზეც სწორედ იტალიელი პარტნიორები ზრუნავენ." - აცხადებს მეწარმე.
"ნადი გრუპი" ლოკოკინებს 2 წელია აწარმოებს. პროდუქცია იტალიაში პირველად მიმდინარე წლის მაისში გაიტანეს. მაშინ საექსპორტო ლოკოკინების რაოდენობამ ხუთი ტონა შეადგინა. წელს ფერმაში 20 ტონამდე ელოდებიან. მეწარმემ ლოკოკინების საწარმოს შექმნა საერთაშორისო ბაზრის შესწავლის შემდეგ გადაწყვიტა. მისი თქმით ლოკოკინებზე მაღალი მოთხოვნაა, როგორც საკვები ინდუსტრიის, ისე ფარმაციული ინდუსტრიის მხრიდანაც. "ნადი გრუპის" ხელმძღვანელი 2 წლის წინ დილემის წინაშე იდგა, ეწარმოებინა ბაყაყები, თუ ლოკოკინები. არჩევანი ლოკოკინებზე მეწარმემ ბაზრის შესწავლის შემდეგ შეაჩერა. როგორც ანალიზმა აჩვენა, მოლუსკების ბაზრის 40% დაუკმაყოფილებელია.
"პროდუქტი არის ძალიან სასარგებლო, მაღალი პროტეინის შემცველობა და ქოლესტერინი აქვს ნული. აქედან გამომდინარე ის არის სასარგებლო და ძალინ ბევრმა ქვეყანამ მისი აქტიურად მოხმარება დაიწყო. თავიდან მისი მომხმარებელი იყო საფრანგეთი, ბოლო 15 წლის განმვალობაში განვითრდა იტალაიში, პორტუგალიაში, ესპანეთსა და ინგლისში. ლოკოკინების ინდუსტრია ახლა ვითარდება ამერიკასა და ჩინეთში. შევისწაველთ ასევე ხარჯების ოდენობაც. პირველადი ინვესტიცია არის ძალიან დიდი, რა თქმა უნდა ის მოითხოვს საჯიშე ლოკოკონების ჩამოყვანას, რომელიც ინვესტიციის დაახლოებით 30% პროცენტია. მისი კაპიტალდაბანდება არის ძვირი, მაგრამ სწაფად ამოღებადია. მომავალ წელს უკვე 100%-იანი მოსავალი გვექნება. ქართული წარმოების ლოკოკინები უკვე იყიდება ადგილობრივ ბაზარზე. დაინტერესებაა ჰოლანდიიდან სამკურნალო ფარმაცევტული კომპანიების მხრიდან. აღმოჩნდა, რომ ლოკოკინის ლოსიონს ითხოვს კოსმეტიკური წარმოების მსხვილი მწარმოებლებიც. შეკვეთილი გვაქვს ლორწოს შემკრები სპეციალური აპარატიცბ და მალე ლოკოკინის ხორცის პარალელურად, მისი ლორწოს რეალიზაციასაც შევძლებთ" - გვითხრა საწარმოს დამფუძნებელმა, მერაბ ნადარაიამ.
ბელა გელაშვილი
ავტორი