ყაზახეთში მიმდინარე მოვლენების ფონზე, წარმოშობით ქართველი, ყაზახეთში მოღვაწე ბიზნესმენის, მიხეილ ლომთაძის ქონება 3 მილიარდი აშშ დოლარით შემცირდა. Report.ge-ს ცნობით, ამის შესახებ ინფორმაციას Bloomberg ავრცელებს.
ლომთაძე ყაზახური საფინანსო ტექნოლოგიური კომპანიის, Kaspi-ს მმართველი საბჭოს ხელმძღვანელი და კომპანია Kaspi Bank-ის ერთ-ერთი მფლობელია.
კომპანიის უმსხვილესმა აქციონერებმა, ვიაჩესლავ კიმმა და მიხეილ ლომთაძემ წელს თითქმის $3 მილიარდი დაკარგეს.
ყაზახეთში განვითარებული მოვლენების ფონზე, ლონდონის ბირჟაზე უმსხვილესი ყაზახური კომპანიების აქციები, მათ შორის Kaspi.kz-ის, მკვეთრად დაეცა. კომპანიამ ერთ სავაჭრო დღეში, 2022 წლის 5 იანვარს 30%-ზე მეტით იზარალა.
Forbes-ის ინფორმაციით, ამ დროისათვის ქართველი ბიზნესმენის ქონება 4.1 მილიარდ აშშ დოლარს შეადგენს და უმდიდრესი ადამიანების რეიტინგში 956-ე ადგილს იკავებს.
მიხეილ ლომთაძე Bloomberg-ის მილიარდერების რეიტინგიდან ამოვარდა.
