თბილისის აბრეშუმის გზის ფორუმის საქართველოს საინვესტიციო შესაძლებლობების თემატურ პანელზე, საქართველოს ეკონომიკისა და მდგრადი განვითარების მინისტრმა ნათია თურნავამ საქართველოში შექმნილ ბიზნესკლიმატზე, მაკროეკონომიკური სტაბილურობის მნიშვნელობაზე და ქვეყნის ეკონომიკური ზრდის მაჩვენებლებზე ისაუბრა. მისი განმარტებით, ენერგეტიკა საინვესტიციოდ ერთ-ერთ ყველაზე მიმზიდველ დარგად რჩება. ეს კი მინისტრის თქმით, არის იმ რეფორმების და ბაზრის დერეგულაციის შედეგი, რომელსაც ხელისუფლება ახორციელებს.
"ენერგეტიკა წინმსწრები ტემპით უნდა ვითარდებოდეს, რათა ეკონომიკის განვითარება დამამუხრუჭებელი არ გახდეს. ენერგეტიკა არის ის დარგი, რომელიც არის ქვეყნის ხერხემალი, რადგან ენერგეტიკული უზრუნველყოფის გარეშე ვერც ერთი დარგი ვერ იარსებებს. ამიტომაც ჩვენი ხელისუფლებისთვის ყოველთვის იყო პრიორიტეტი ეს სეგმენტი," - განაცხადა ნათია თურნავამ.
სტატისტიკის ეროვნული სამსახურის მონაცემებით, „ქართული ოცნების“ ხელისუფლების მოსვლის შემდეგ, ენერგეტიკის სექტორში ჩადებული ინვესტიციები წლების მიხედვით ასე გამოიყურება:
2011 - $ 212 მილიონი
2012 - $ 179 მილიონი
2013 - $ 246 მილიონი
2014 - $ 190 მილიონი
2015 - $ 123 მილიონი
2016 - $ 145 მილიონი
2017 - $ 280 მილიონი
2018 - $ 120 მილიონი
ცნობისთვის, ენერგომიმართულებით გააქტიურება მთავრობამ რამდენიმე დღის წინ დააანონსა. ნათია თურნავა ცდილობს მოქალაქეები ჰესების აუცილებლობაში დაარწმუნოს, დღეს კი ეკონომიკის მინისტრი ენერგოსექტორში ინვეტორებს შეღავათებსაც დაჰპირდა.
ბელა გელაშვილი
ავტორი