ეკონომიკისა და მდგრადი განვითარების მინისტრმა ნათია თურნავამ პროგრამის „აწარმოე საქართველოში“ ბენეფიციარი საწარმო „მეამას“ წარმოება დაათვალიერა და საწარმოო პროცესს გაეცნო. მასთან ერთად, საწარმოში იმყოფებოდა სააგენტოს „აწარმოე საქართველოში“ დირექტორი მიხეილ ხიდურელი.
კომპანია „მეამა“ პროგრამის „აწარმოე საქართველოში“ ინდუსტრიული კომპონენტის მხარდაჭერით გაიხსნა და მსოფლიოს მასშტაბით ერთადერთია, რომელიც ერთდროულად აწარმოებს როგორც ევროპული, ისე ამერიკული ფორმატის ყავის კაფსულებს. საწარმოში ამჟამად 120 ადამიანია დასაქმებული, კომპანიის ინფორმაციით, მათი რიცხვი 500-მდე გაიზრდება.
მეამას“ ყავის ქარხანა 30 ათას კვადრატულ მეტრზეა განთავსებული. აღსანიშნავია, რომ მისი შენობა, რომელიც ყურადღებას იქცევს თავისი განსხვავებული არქიტექტურით, 2019 წელს საუკეთესო ინდუსტრიული შენობის კატეგორიაში „ArchDaily&Strelka Award“-ის გამარჯვებული გახდა.
ყავის კაფსულების გარდა, საწარმოში მზადდება ინოვაციური „მეამა დროფერი,“ რომელსაც მსოფლიოში ანალოგი არ აქვს. დროფერი წარმოადგენს უნივერსალურ გამოსავალს ოფისებისთვის და ბიზნეს ცენტრებისთვის, რაც თავის მხრივ სრულად ანაცვლებს ტრადიციულ ყავის „ვენდინგ მანქანებს“.
აღსანიშნავია, რომ სააგენტოს „აწარმოე საქართველოში“ მხარდაჭერით, კომპანია პირველად წარდგა საერთაშორისო გამოფენაზე, კერძოდ China International Import Expo-ზე, სადაც დიდი ყურადღება მიიქცია წარმოებულმა პროდუქციამ. „მეამაში“ აცხადებენ, რომ ქართული ყავის კაფსულებით არამხოლოდ ქართული ბაზრიs, არამედ საერთაშორისო ბაზრების მომარაგებაც იგეგმება.
როგორც ეკონომიკის მინისტრმა აღნიშნა, 2014 წლიდან დღემდე „აწარმოე საქართველოში“ პროგრამის ფარგლებში მხარდაჭერილია დაახლოებით 500 ქართული საწარმო, 350-მდე მცირე სასტუმრო, ხოლო მთელი საქართველოს მასშტაბით 10,000 - მდე ბენეფიციარმა მიიღო მონაწილეობა მიკროგრანტების პროგრამაში და შეძლო მცირე ბიზნესსაქმიანობის დაწყება.
„პროგრამამ შეიძინა ძალიან ბევრი მეგობარი, მომხრე და პოპულარობით სარგებლობს ქართველ ბიზნესმენთა შორის. ერთ მილიარდ ლარზე მეტი ინვესტიცია განხორციელდა ამ პროგრამის მხარდაჭერით და, რაც მთავარია, შეიქმნება დაახლოებით 17,000 ახალი სამუშაო ადგილი მთელ საქართველოში - ქალაქებსა თუ რეგიონებში“ - განაცხადა ნათია თურნავამ.
ბელა გელაშვილი
ავტორი