დოკუმენტის პირველადი პროექტისგან განსხვავებით, საბოლოო ვერსიაში ხარჯვითი ნაწილი 221 მილიონი ლარით, 14 მილიარდ 432 მილიონ 866 ათას ლარამდე გაიზარდა. ეს 2019 წლის ბიუჯეტში ჩადებულ მაჩვენებელზე დაახლოებით 1.1 მილიარდი ლარით მეტია.
2020 წლის ბიუჯეტში თავდაპირველად ეკონომიკური ზრდის ხუთპროცენტიანი მაჩვენებელი ჩაიდო, თუმცა საერთაშორისო სავალუტო ფონდის რეკომენდაციით, 4.5 პროცენტამდე შემცირდა.
ბიუჯეტში სოციალური დანახარჯებისთვის დამატებით გამოყოფილია 300 მილიონი ლარი. პირველი იანვრიდან პენსიების და სოციალური დახმარებისთვის 20-ლარიანი ზრდა არის გათვალისწინებული, ხოლო პირველი ივლისიდან, 70 წლის და უფრო მაღალი ასაკის პენსიონრებისთვის, ასევე 18 წლამდე და მკვეთრად გამოხატული შეზღუდული შესაძლებლობის მქონე პირებისთვის, პენსიის დამატებით 30-ლარიანი ზრდა.
2020 წლის ბიუჯეტში მასწავლებელთა ხელფასების ზრდისთვის გამოყოფილია 120 მილიონი ლარი.
მასწავლებლებს ხელფასები 150 ლარით გაეზრდებათ. ხელფასების ზრდა იგეგმება პოლიციელებისთვის, სახანძრო-სამაშველო სამსახურების თანამშრომლებისთვის, ჯარისკაცებისთვის, პირველადი ჯანდაცვის პერსონალისა და საბავშვო ბაღების პერსონალისთვისაც.
მომავალი წლის ბიუჯეტში გარზდილია ხარჯები ინფრასტრუქტურაზე, მათ შორის რეგიონული განვითარებისა და ინფრასტრუქტურის სამინისტროს ბიუჯეტი 2 მილიარდ 070 მილიონ ლარს შეადგენს.
ბელა გელაშვილი
ავტორი