თავში

პირდაპირი უცხოური ინვესტიციები შემცირებულია

პირდაპირი უცხოური ინვესტიციები შემცირებულია

2019 წლის მეორე კვარტალში საქართველოში შემოსული პირდაპირი უცხოური ინვესტიციები (FDI) 53.7%-ით შემცირდა. კვარტალური ინვესტიციების ასეთი დრამატული ვარდნა ქვეყანაში ბოლოს მხოლოდ 2008 წლის აგვისტოს ომის შემდგომ პერიოდში იყო. თანხობრივად კლება $216 მილიონ აშშ დოლარს შეადგენს. ომმა უფრო მნიშვნელოვანი გავლენა 2009 წლის ინვესტიციებზე მოახდინა, წლის პირველ და მეორე კვარტალში კლება 70%-ს აღემატებოდა. 2010 წლიდან მოყოლებული არცერთი კვარტლის განმავლობაში პირდაპირი უცხოური ინვესტიციების მაჩვენებლის ასეთი დრამატული შემცირება არ დაფიქსირებულა.

საქსტატმა დღეს პირდაპირი უცხოური ინვესტიციების ამსახველი ანგარიში გამოაქვეყნა, რომლის მიხედვითაც, საქართველოში FDI-ს მოცულობამ $187 მილიონი შეადგინა რაც წინა წელთან შედარებით 53.7%-ით ნაკლებია.

ოფიციალური სტატისტიკის მიხედვით, ინვესტიციების შემცირება ქვეყნის ეკონომიკის სექტორების მნიშვნელოვან ნაწილში შეიმჩნევა. ცალკეული მიმართულებების მიხედვით არსებული ვითარება ასეთია:
ენერგეტიკა - $63.7 მილიონი, კლება წინა წელთან 37%;
მშენებლობა - $4.2 მილიონი, კლება წინა წელთან 91%;
ტრანსპორტი და კავშირგაბმულობა - $19.8 მილიონი, კლება წინა წელთან 73%;
სამთომოპოვებითი მრეწველობა - $15.4 მილიონი, კლება წინა წელთან 7%;
უძრავი ქონება - $22.8 მილიონი, კლება წინა წელთან 63%;

ზრდა შეიმჩნევა სოფლის მეურნეობის, ტურიზმისა და დამამუშავებელი მრეწველობის დარგებში.

ცალკეული ქვეყნების მიხედვით, შემცირება ასეთია:

აზერბაიჯანი - $19.5 მილიონი, კლება წინა წელთან 80%;
ნიდერლანდები - $58.1 მილიონი, კლება წინა წელთან 23%;
თურქეთი - $36 მილიონი, კლება წინა წელთან 8%;
ჩეხეთი - $14.8 მილიონი, კლება წინა წელთან 81%;

საქსტატის განმარტებით, შემცირების მიზეზს მაგისტრალური გაზსადენის მშენებლობის დასრულება წარმოადგენს. ორგანიზაცია ასევე აცხადებს, რომ შემცირების კიდევ ერთი მიზეზი არარეზიდენტი პირდაპირი ინვესტორის მიმართ ვალდებულებების შემცირება და რეინვესტიციების მოცულობის შემცირებაა.

სამი უმსხვილესი სექტორის წილმა (განხორციელებული პირდაპირი უცხოური ინვესტიციების მიხედვით) 2019 წლის II კვარტალში 69.6 პროცენტი შეადგინა. ყველაზე მეტი პირდაპირი უცხოური ინვესტიცია ენერგეტიკის სექტორში განხორციელდა და 63.7 მლნ. აშშ დოლარს მიაღწია, რაც მთლიანი პირდაპირი უცხოური ინვესტიციების 34.0 პროცენტია. მეორე ადგილზე იმყოფება დამამუშავებელი მრეწველობის სექტორი 38.4 მლნ. აშშ დოლარით, ხოლო მესამეზე - სასტუმროების და რესტორნების სექტორი 28.1 მლნ. აშშ დოლარით.

ტექსტში შეცდომის აღმოჩენისას, გთხოვთ, მონიშნოთ არასწორი ნაწილი და დააჭირეთ Ctrl + Enter.

კატეგორიის სხვა ახალი ამბები

ბოლო სიახლეები

ბოლო სიახლეები



orphus_system