მეზობელ ქვეყნებთან შედარებით, საქართველოს ყველაზე დაბალი ეკონომიკური ზრდის ტემპი აქვს.
2021 წლის მარტში საქართველოს ეკონომიკა 2020 წლის ანალოგიურ პერიოდთან შედარებით 4%-ით გაიზარდა, თუმცა, ამის მიუხედავად, პირველ კვარტალში საქართველოს ეკონომიკა 4.2%-ით შემცირდა.
რაც შეეხება მეზობელ ქვეყნებს, მიმდინარე წლის პირველ კვარტალში სომხეთის ეკონომიკა წინა წლის ანალოგიურ პერიოდთან შედარებით 3.3%-ით შემცირდა.
2021 წლის პირველ კვარტალში აზერბაიჯანის ეკონომიკა მხოლოდ 1.3%-ით შემცირდა. წინა წლის ანალოგიურ პერიოდთან შედარებით, აზერბაიჯანში ნავთობპროდუქტების წილმა ეკონომიკურ ზრდაში 6.4%-ით მოიმატა, რისი მთავარი მიზეზიც სანავთობო ბაზარზე სიტუაციის დასტაბილურებაა. აზერბაიჯანის მიერ მსოფლიო ბაზარზე მიწოდებული ნედლი ნავთობის ფასი 69 დოლარამდე გაიზარდა. შეგახსენებთ, რომ Azeri LT CIF-ზე ყველაზე დაბალი ფასი 2020 წლის 21 აპრილს დაფიქსირდა (15,81 აშშ დოლარი), ხოლო მაქსიმალური - 2008 წლის ივლისში (149,66 აშშ დოლარი).
საქართველოს ჩრდილოელ მეზობელ რუსეთს, მიმდინარე წლის 3 თვეში ეკონომიკა საშუალოდ 1.4%-ით შეუმცირდა. რუსეთში 0.5%-იანი ეკონომიკის ზრდა მხოლოდ მარტში დაუფიქსირდა.
მეზობელი ქვეყნებიდან ყველაზე კარგი ეკონომიკური მდგომარეობა თურქეთშია. მიმდინარე წლის პირველ კვარტალში იქ ეკონომიკა შემცირების ნაცვლად, 1.7%-ით გაიზარდა. თურქეთში 5%-იან ეკონმიკურ ზრდას პროგნოზირებენ.
აღსანიშნავია, რომ საქართველოს მთავრობა წელს ეკონომიკის 4.3%-იან ზრდას პროგნოზირებს.
