„მსოფლიო ბანკი საქართველოს ძლიერ და ერთგულ პარტნიორად რჩება და მხარს დაუჭერს მთავრობის ღონისძიებებს ჯანდაცვის, სოციალური დაცვის და ეკონომიკის აღდგენის მიმართულებით, რომლებიც აუცილებელია ქვეყანასა და მოსახლეობაზე პანდემიით გამოწვეული ზემოქმედების შესასუსტებლად,“ – აღნიშნავს სამხრეთ კავკასიაში მსოფლიო ბანკის რეგიონულმა დირექტორი, სებასტიან მოლინეუსი კორონავირუსის ქართულ ეკონომიკაზე გავლენის ანალიზისას.
როგორც მსოფლიო ბანკის მიერ გავრცელებულ პრესრელიზშია აღნიშნული, ქვეყანაში მშპ-ის რეალური ზრდა მკვეთრად შემცირდება და 2020 წელს ნულოვან პროცენტს მიუახლოვდება.
„ეს ნაწილობრივ შერბილდება ფისკალური სტიმულირებით მშპ-ის დაახლოებით 2 პროცენტით, კაპიტალური ხარჯვის სიჩქარის შეკავებით, საგადასახადო დავალიანების დაფარვის გადავადებით, დღგ-ის დაბრუნების დაჩქარებით და დარგობრივი მხარდაჭერის აღმოჩენით ზემოქმედების ქვეშ მყოფი საწარმოებისთვის, ისევე როგორც სოციალური ხარჯების ზრდით. აღნიშნული ღონისძიებების შედეგად, ანგარიშის თანახმად, მოსალოდნელია, რომ ფისკალურმა დეფიციტმა 2020 წელს მშპ-ის 5.2 პროცენტი შეადგინოს“, – აღნიშნულია მსოფლიო ბანკის მიერ გავრცელებულ ინფორმაციაში.
ამასთან, მსოფლიო ბანკი განმარტავს, რომ საქართველოს ეკონომიკაზე მწვავე ზემოქმედება ექნება რამდენიმე ფაქტორს – სატრანსპორტო შეზღუდვები გავლენას ახდენს მოგზაურობაზე და ტურიზმზე, ხოლო შემაკავებელი ღონისძიებები ამცირებს ადგილობრივ მოთხოვნას.