ფინანსური ბაზრის მკვლევარი, ანალიტიკოსი ნიკა შენგელია ფიქრობს, რომ მონეტარული პოლიტიკის შერბილება ამ ეტაპზეც შესაძლებელია, რაც საპროცენტო განაკვეთების კლებას გამოიწვევს და ბიზნესს საგადასახადო ტვირთს შეუმსუბუქებს. ანალიტიკოსის აზრით, ასეთი შესაძლებლობა სებ-ს რეალურად ახლაც გააჩნია, მაგრამ შესაბამის ზომებს არ მიმართავს.
,,მიმაჩნია, რომ მონეტარული პოლიტიკა უნდა შერბილდეს. რეფინანსირების განაკვეთის შემცირება შეიძლებოდა 4-5%-ის ფარგლებში. მსოფლიოში შექმნილია ისეთი სიტუაცია, რომ ეს განაკვეთი მოახდენდა გავლენას სესხებზე და პროცენტებს შეამცირებდა. სესხები უნდა იყოს უფრო იაფი. მოგეხსენებათ, რომ ლარში გაცემული სესხები ბოლო პერიოდშიც გაძვირდა (რეფინანსირების განაკვეთზე მიბმული სესხები) და ასეთ პირობებში როგორც მცირე და საშუალო, ასევე მსხვილ ბიზნესსაც ძალიან გაუჭირდება არსებობა. სებ-ი მართავს ისეთ სიტუაციას, რომ შეამციროს ლარის მასა ქართულ ეკონომიკაში, რაც ამ ეტაპზე შესაძლებელი არ არის. მეტი მომსახურება, მეტი პროდუქცია უნდა შეიქმნას, რაც რისკს დააბალანსებს", - ამბობს ანალიტიკოსი.
რაც შეეხება ევრობონდის გადახდის ვალდებულებას, შენგელია არ გამორიცხავს, რომ 500 მილიონიანი რესურსი ეროვნული ბანკის რეზერვიდან დაიფაროს, რაც მისი თქმით, კურსზე ნეგატიურად იმოქმედებს და არ არის გამორიცხული, მისი გაუფასურება გამოიწვიოს. თუმცა რისკია ინფლაციასთან დაკავშირებითაც.
,,თუკი დავუშვებთ, რომ არჩევნებს მოყვება არასტაბილურობა, ეს ასევე ნეგატიურად იმოქმედებს კურსზე და საბოლოოდ ფასებზეც აისახება. როგორც პროდუქციის, ასევე მომსახურების ღირებულება მოიმატებს და ინფლაციის მაჩვენებელი გაიზრდება. ამ პროცესების გამორიცხვით, სებ-ი დარწმუნებული, რომ 3%-ს მიახლოვდება ინფლაციის მიზნობრივი მაჩვენებელი. მაშინ მიკვირს, რატომ ინარჩუნებს ეროვნული ბანკი ასეთ მაღალ საპროცენტო განაკვეთს, როცა აქვს საშუალება, რომ პროცენტები დაბლა დაწიოს, მაგრამ ამას ჯერჯერობით არ აკეთებს", - აღნიშნავს ანალიტიკოსი.
ცნობისთვის, "თიბისი კაპილატის" მაკრო-სექტორულ მიმოხილვაში აღნიშნულია, რომ 2021 წლის მეორე ნახევრამდე რეფინანსირების განაკვეთის შემცირება არ არის მოსალოდნელი.
დოკუმენტის მიხედვით, საგარეო დაფინანსების არსებული გეგმის პირობებში სავალუტო ინტერვენციების გასაგრძელებლად რესურსი საკმარისია, თუმცა, ევრობონდის დაფარვის გეგმა გარკვეულ რისკებთან შეიძლება იყოს დაკავშირებული.
მარიამი ჩიტაია
ავტორი