10 ივლისის მონაცემებით, აგროწარმოების ხელშეწყობის პროგრამის პირობებთან შესაბამისობაშია წარმოდგენილი 380-ზე მეტი განაცხადი.
ამის შესახებ REPOPR.GE-ს სოფლის მეურნეობის სამინისტროდან აცნობეს.
უწყება არ აკონკრეტებს ამჯერად ჯამში რამდენი განაცხადია რეგისტრირებული. არც ის ზუსტდება, რის დაფინანსებას ითხოვენ უფრო მეტად ფერმერები წარმოდგენილი განცხადებებით.
გასული კვირის ბოლოს, 3 ივლისის მდგომარეობით, აგროწარმოების ხელშეწყობის პროგრამაში რეგისტრირებული იყო 551 განაცხადი. განაცხადების უმეტესობა, 250 -ზე მეტი განაცხადი, სასოფლო-სამეურნეო ტექნიკის თანადაფინანსების მოთხოვნა იყო.
სასათბურე მეურნეობის მოწყობისთვის და მოდერნიზებისთვის შესასყიდი ძირითადი საშუალებების შეძენის და მათი სამონტაჟო სამუშაოების, ასევე, ერთწლოვანი სასოფლო-სამეურნეო კულტურებისთვის სარწყავი სისტემის შესყიდვასა და მონტაჟის თანადაფინანსების მოთხოვნით გასულ კვირას დაფიქსირდა 200-ზე მეტი განაცხადი.
ბელა გელაშვილი
ავტორი