„ევროკავშირი გარემოსთვის“ (EU4Environment) პროგრამის ფარგლებში შეხვედრა თემაზე „მწვანე ეკონომიკა და ზრდის ახალი შესაძლებლობები მცირე და საშუალო საწარმოებისათვის საქართველოში“ გაიმართა.
შეხვედრაში გარემოს დაცვისა და სოფლის მეურნეობის მინისტრის მოადგილე, ნინო თანდილაშვილი, ეკონომიკისა და მდგრადი განვითარების მინისტრის პირველი მოადგილე ეკატერინე მიქაბაძე, საქართველოს მცირე და საშუალო ბიზნესის, ცენტრალური და ადგილობრივი მთავრობის, აკადემიური ინსტიტუტების, საერთაშორისო ორგანიზაციებისა და სამოქალაქო საზოგადოების წარმომადგენლები მონაწილეობდნენ.
„EU4Environment პროგრამის ერთ-ერთი ყველაზე მნიშვნელოვანი კომპონენტი მცირე და საშუალო საწარმოებში ეკოინოვაციებისა და რესურსეფექტური ტექნოლოგიების დანერგვაა. სუფთა წარმოების წახალისება მდგრადი განვითარების ერთ-ერთი მნიშვნელოვანი კომპონენტია გარემოს დაცვის კუთხით. პროგრამის დახმარებით და ჩვენი ექსპერტების აქტიური ჩართულობით, მცირე და საშუალო საწარმოები წარმატებით შეძლებენ რესურსეფექტური და სუფთა ტექნოლოგიებზე დაფუძნებული ბიზნეს მოდელების შექმნას“, - განაცხადა ნინო თანდილაშვილმა.
EU4Environment პროგრამა აღმოსავლეთ პარტნიორობის ექვს ქვეყანას - სომხეთს, აზერბაიჯანს, ბელარუსს, საქართველოს, მოლდოვას და უკრაინას - იმგვარი მართვის და ეკონომიკური განვითარების მექანიზმების დანერგვაში ეხმარება, რომლებიც გარემოზე ზეგავლენის რისკებს შეამცირებს და ბუნებრივი რესურსების შენარჩუნებას და მოსახლეობის კეთილდღეობის ამაღლებას შეუწყობენ ხელს.
შეხვედრაზე ეკოინოვაციებისა და სუფთა წარმოების (RECP) მიდგომებზე იმსჯელეს, რომელთა საშუალებითაც მცირე და საშუალო ბიზნესი ცირკულარულ ეკონომიკაზე გადასვლას შეძლებს. განისაზღვრა ადგილობრივი პარტნიორები (კომპანიები, ინსტიტუტები და ექსპერტები), რომლებიც მონაწილეობას მიიღებენ ეკოინოვაციებისა და RECP მიდგომების დანერგვის პროექტებში და ინოვაციური ბიზნეს სტრატეგიების შემუშავებაში.
ბელა გელაშვილი
ავტორი