საქართველოს კონკურენციის ეროვნული სააგენტოს თავმჯდომარემ, ირაკლი ლექვინაძემ ანალიტიკური ორგანიზაცია „ჯეოქეისის“ ორგანიზებით დაგეგმილ ონლაინღონისძიებაში სპიკერის რანგში მონაწილეობა მიიღო.
შეხვედრაში ასევე მონაწილეობდნენ სემეკ-ის თავმჯდომარე დავით ნარმანია და კომუნიკაციების კომისიის წევრი ვახტანგ აბაშიძე.
ირაკლი ლექვინაძემ შეხვედრაზე ასევე ისაუბრა 2020 წელს განხორციელებული სხვა მნიშვნელოვანი აქტივობების შესახებ, რომელიც საკანონმდებლო ცვლილებებს შეეხებოდა. მისი განმარტებით, კონკურენციის საკითხებზე, მარეგულირებელი ორგანოები ხელმძღვანელობენ „კონკურენციის შესახებ“ საქართველოს კანონის ძირითადი პოსტულატებით და ამ კანონზე დაყრდნობით შეისწავლიან საკითხებს, თუ ქმედების განმახორციელებელი ყველა სუბიექტი წარმოადგენს ერთი და იმავე რეგულირებადი სფეროს ეკონომიკურ აგენტს. ლექვინაძემ ხაზი გაუსვა, რომ მიღებული ცვლილებები ჩასწორდა ევროპელი და ადგილობრივი ექსპერტების რეკომენდაციების საფუძველზე. კონკურენციის სააგენტოს ხელმძღვანელი დარწმუნებულია, რომ დღეს მიღებული შედეგები იძლევა იმის შესაძლებლობას, რომ უწყებების მუშაობა იყოს მეტად ეფექტიანი და შედეგზე ორიენტირებული, რაც, თავის მხრივ, შესაბამის ბაზრებზე, გაზრდის კონკურენციას.
„კონკურენციის-სამართლებრივ წარმოებაში მხარეთა უფლებების უკეთ დაცვის მიზნით, 2020 წელს საქართველოს პარლამენტმა „კონკურენციის შესახებ“ კანონში ცვლილებების პაკეტი დაამტკიცა, რომელიც მაქსიმალურად ასახავს ევროკავშირის კონკურენციის სამართალში არსებულ პრინციპებს, პასუხობს სააგენტოს წინაშე მდგარ გამოწვევებს და ემსახურება მთელი რიგი პრაქტიკული თუ სამართლებრივი ხარვეზების აღმოფხვრას. მიღებული ცვლილებების შედეგად, საქართველოს კონკურენციის ეროვნული სააგენტო და ეკონომიკის რეგულირებადი სფეროს მარეგულირებლები კონკურენციის სამართლის ძირითად საკითხებზე ერთიანი პრინციპებით მოქმედებენ. შექმნილია ერთიანი საკანონმდებლო ბაზა და „კონკურენციის შესახებ“ საქართველოს კანონის ძირითადი დებულებები (კონცენტრაცია, დომინირებული მდგომარეობის ბოროტად გამოყენება, კონკურენციის შემზღუდველი შეთანხმებები, ჯარიმა) სავალდებულოდ აღსასრულებელია მარეგულირებელი ორგანოებისთვისაც. გამიჯნულია საქართველოს კონკურენციის ეროვნულ სააგენტოსა და ეკონომიკის რეგულირებადი სფეროს მარეგულირებელი ორგანოების კომპეტენციის ფარგლები. სააგენტო შეისწავლის რეგულირებად სექტორში განხორციელებულ ქმედებებს, თუ ერთ-ერთი მხარე არის არარეგულირებად სფეროში მოქმედი სუბიექტი, ასევე თუ ქმედება – დავის საგანი არარეგულირებად სფეროშია განხორციელებული და თუ სუბიექტები წარმოადგენენ სხვადასხვა რეგულირებადი სფეროს ეკონომიკურ აგენტებს," – განაცხადა შეხვედრისას საქართველოს კონკურენციის ეროვნული სააგენტოს თავმჯდომარემ და ღონისძიების ორგანიზატორს, მონაწილეებს თანამშრომლობისათვის მადლობა გადაუხადა.
შეხვედრა კითხვა-პასუხის ფორმატში წარიმართა, რომელსაც ღონისძიების მოდერატორი, „ჯეოქეისის“ თავმჯდომარის მოადგილე ბაქარ ფალავანდიშვილი ხელმძღვანელობდა.
