თავში

როგორია სახაზინო ობლიგაციების შემოსავლიანობა

როგორია სახაზინო ობლიგაციების შემოსავლიანობა
როგორია სახაზინო ობლიგაციების შემოსავლიანობა

აშშ-ში სახაზინო ობლიგაციების შემოსავლიანობა კვლავ მაღალ ნიშნულზე შენარჩუნდა მარტში (1.73% 2021 წლის 30 მარტისთვის), მიუხედავად იმისა, რომ FED-მა ბოლოს გამართულ მონეტარული პოლიტიკის შეხვედრაზე 2024 წლამდე საპროცენტო განაკვეთების ნულოვან ნიშნულზე შენარჩუნება დააანონსა. ამის შესახებ აღნიშნულია Galt and Taggart-ის ახალ ანგარიშში. დოკუმენტის მიხედვით, აშშ-ში გაზრდილი საპროცენტო განაკვეთების უარყოფითი გავლენის შესამსუბუქებლად მარტის მეორე ნახევარში ევროპის ცენტრალურმა ბანკმა ობლიგაციების ყიდვის პროგრამის შესყიდვის ტემპი დააჩქარა (EUR 14 მლრდ-დან EUR 21.1 მლრდ-მდე). 

აქვე აღნიშნულია, რომ მარტში განვითარებადი ბაზრებიდან (EM) კაპიტალის გადინება მოხდა. საერთაშორისო საფინანსო ინსტიტუტის მონაცემებზე დაყრდნობით ჯამში განვითარებადი ბაზრებიდან მარტში $4.8 მლრდ-ის გადინება მოხდა (26 მარტამდე). აღსანიშნავია, რომ 2020 წლის სექტემბრის შემდეგ ეს ყველაზე მსხვილი გადინებაა განვითარებადი ბაზრებიდან.

"პორტფელური ინვესტიციების გადინების რამდენიმე სავარაუდო მიზეზია: აშშ-ში სახაზინო ობლიგაციებზე მზარდი საპროცენტო განაკვეთები, ასევე განვითარებად ბაზრებზე მზარდი ვირუსის შემთხვევები და თურქეთში არსებული მდგომარეობაა, რაც უარყოფითად აისახება ინვესტორების განწყობებზე," - აღნიშნულია ანგარიშსი. 

აქვე თურქეთის მოვლენებზეც არის საუბარი.დოკუმენტში განმარტებულია, რომ  2021 წლის მარტში თურქეთის ეკონომიკურ ბლოკში მორიგი გადატრიალება მოხდა. 20-21 მარტს, თურქეთის პრეზიდენტმა თანამდებობიდან გაათავისუფლა თურქეთის ცენტრალური ბანკირი, რომელიც ამ პოსტზე 4 თვის წინ, 2020 წლის ნოემბერში დაინიშნა და პოსტზე დანიშვნის შემდეგ მონეტარული პოლიტიკის განაკვეთი ჯამში 8.75პპ-ით გაზარდა 19%-მდე (ბოლო ზრდა 19 მარტის შეხვედრაზე განხორციელდა). თურქეთის ახალ ცენტრალურ ბანკირად დაინიშნა საჰაპ კავჩიოღლუ, რომელიც იზიარებს ერდოღანის შეხედულებას დაბალი საპროცენტო განაკვეთების შესახებ, ძირითადი ეკონომიკური თეორიების საწინააღმდეგოდ. აღნიშნული ცვლილების შემდეგ თურქული ლირა რეკორდულად, 14%-ით, გაუფასურდა. 

აქვე გაანალიზებულია მონეტარული პოლიტიკა რეგიონულ ჭრილში. Galt and Taggart-ი განმარტავს, რომ მარტში მონეტარული პოლიტიკა რამდენიმე რეგიონალურმა ცენტრალურმა ბანკმა გაამკაცრა. კერძოდ, 19 მარტს გამართულ შეხვედრაზე რუსეთის ცენტრალურმა ბანკმა პოლიტიკის განაკვეთი 25სპით გაზარდა 4.50%-მდე, რაც გაზრდილი ინფლაციური და გეოპოლიტიკური რისკებს უკავშირდება. ორგანიზაცია შენიშნავს, რომ მარტში საქართველოს ეროვნულმა ბანკმა გაზრდილი ინფლაციური რისკების გამო პოლიტიკის განაკვეთი 50სპ-ით 8.5%-მდე გაზარდა.

ტექსტში შეცდომის აღმოჩენისას, გთხოვთ, მონიშნოთ არასწორი ნაწილი და დააჭირეთ Ctrl + Enter.

კატეგორიის სხვა ახალი ამბები

ბოლო სიახლეები

ბოლო სიახლეები



orphus_system