წაბლი და ცაცხვი საქართველოში გავრცელებული მრავალწლიანი კულტურებია. ორივე მათგანი ჩვენი ფლორის ბუნებრივი მახასიათებელია. გარდა იმისა, რომ მათი მოვლა-გამრავლება სასიცოცლოდ მნიშვნელოვანია თაფლის წარმოებისთვის, მათი ნაყოფის რეალიზაციით, დიდი მოგების მიღებაა შესაძლებელი.
წაბლის გადამამუშავებელი კომპანიის „აგროლეინის“ დირექტორის, გიორგი ღვინიაშვილის, განცხადებით, გასულ წელს კომპანიამ 50 ტონა წაბლი გადაამუშავა და ექსპორტზე გაიტანა, წელს კი ამ მოცულობას 300 ტონამდე გაზრდის. როგორც მეწარმე Report.ge-ს უხსნის, მსოფლიოში წაბლზე დიდი მოთხოვნაა, ამიტომ წარმოების გაზრდას მომავალი წლისთვისაც გეგმავს. „აგროლეინის“ მიერ გადამუშავებული წაბლის 100% ექსპორტზე საფრანგეთსა და შვეიცარიაში გადის.
"ევროპულ ბაზარზე ამჟამად დიდია ქართულ წაბლზე მოთხოვნა. 1 კილოგრამი გაყინული წაბლის ღირებულება 1,5-დან 2 ევრომდე მერყეობს. ჩვენ მიმღები პუნქტები აჭარასა და იმერეთში გავხსენით. შარშან 50 ტონამდე წაბლი გადავამუშავეთ. წლეულს ამ რაოდენობის რამდენჯერმე გაზრდასა და ექსპორტზე გატანას ვაპირებთ. ცოტათი უამინდობამ შეგვიშალა ხელი. ძნელია წინასწარ ზუსტად განსაზღვრა, რა რაოდენობის დამზადებას შეძლებ. თუმცა ფაქტია, რომ წაბლის ექსპორტი პერსპექტიული ბიზნესია," - გვითხრა მეწარმემ.
აჭარაში 26 მიმღები პუნქტია და წაბლს ასზე მეტი ოჯახი აბარებს. წაბლის ერთ ნაწილს ქედის რაიონში არსებული ასოციაცია "ქედა" გადაამუშავებს, ნაწილი კი იმერეთის რეგიონში, ქალაქ ბაღდათში იგზავნება, "აგროლაინის" კუთვნილ საწარმოში. მიმღები პუნქტების რაოდენობა იმერეთშიც გაიზარდა და ჩვენს ხელთ არსებული მონაცემებით, ოცდაათს აღწევს. აქ ერთ კილოგრამ წაბლს ერთ ლარად იბარებენ. სოფლების მოსახლეობის შეფასებით, ეს დაბალი ანაზღაურებაა.
წინა წლებში ქართული წაბლი სომხეთსა და აზერბაიჯანში, შედარებით ნაკლები მოცულობით, თურქეთშიც გადიოდა. იმერეთისა და აჭარის მოსახლეობა კი პროდუქციას მეტწილად ადგილობრივ ბაზრებზე ჰყიდდა. როგორც Report.ge -ს ხარაგაულის მკვიდრმა, ელგუჯა გელაშვილმა, უთხრა, წელს შავ წაბლს 2,5 ლარად ყიდის, მიმღებ პუნქტებში ლარად, ან მაქსიმუმ 1,5 ლარად აბარებს.
"ძირითადად შავ წაბლს აქვს გასავალი, წითელი შედარებით იაფი ღირს და უცხოელები მისით არ ინტერესდებიან. კულინარიული მიზნით კი უმთავრესად თხილს ეტანებიან. ადრე წაბლზე მაინცდამაინც დიდი მოთხოვნა არ იყო. ბოლო დროს სიტუაცია შეიცვალა. მთავრობამ უნდა შეიმუშავოს აგრარული პოლიტიკის ახალი კონცეფცია, რომლითაც ერთმანეთს შეუხამებს აგრარული, სოციალური და ყოფითი პრობლემების გადაჭრას. მხოლოდ ამ შემთხვევაში ექნება თუნდაც იმავე წაბლის ექსპორტს სასურველი შედეგი. მხოლოდ პიარი ექსპორტს ვერ განავითარებს," - განაცხადა შინამეურნემ.
ბელა გელაშვილი
ავტორი