პროგრამა "დანერგე მომავლის" ფარგლებში გაშენებულ ბაღებში მოსავლის აღების პროცესი მიმდინარეობს. შიდა ქართლის რეგიონში მას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, შიდა ქართლის რეგიონის რწმუნებულის მოადგილესთან ნუგზარ სამხარაძესთან ერთად დაესწრო.
სახელმწიფო პროგრამის „დანერგე მომავალი“ ფარგლებში, გორის მუნიციპალიტეტის სოფელ ძევერაში კომპანიამ „აგროქართლი“ ვაშლის ბაღი 10 ჰექტარზე 2017 წელს გააშენა. კომპანიამ ვაშლის ბაღის გაშენებისათვის და სარწყავი სისტემის მოწყობისთვის 100,000 ლარამდე სახელმწიფო დაფინანსება მიიღო. „აგროქართლი“ 2020 წელს 200 ტონამდე ვაშლის მოსავალს ელოდება, მათ უკვე 30 ტონაზე მეტი ვაშლის ექსპორტი მოახდინეს. კომპანია სეზონურად 60-მდე ადგილობრივს ასაქმებს.
„ქართული ეკონომიკისთვის მნიშვნელოვანი ფაქტორია ის, რომ სახელმწიფოს მხარდაჭერით გაშენებულ ბაღში მისმა მეპატრონეებმა უკვე მიიღეს მოსავალი, რომელიც ექსპორტზე გავიდა მეზობელ ქვეყნებში. დღეისათვის, საქართველოდან უკვე 1,000 ტონაზე მეტი ვაშლია ექსპორტირებული. ვფიქრობ, რომ წელს ძალიან დიდი წარმატება გვექნება ამ მიმართულებითაც, ისევე როგორც სხვა კულტურებში“ - განაცხადა გიორგი ხანიშვილმა.
შიდა ქართლის რეგიონის რწმუნებულის მოადგილის ნუგზარ სამხარაძის განცხადებით, რეგიონისთვის მნიშვნელოვანია პროექტები, რომელსაც სახელმწიფო სოფლის მეურნეობის მიმართულებით ახორციელებს, გრძელდება ბაღების გაშენება, ხოლო ახალ ბაღებში დაიწყო მოსავლის მიღება, რომელიც მოგებაში კაპიტალიზირდება. ეს უკვე თვალსაჩინოა მეწარმისთვის და მთლიანად რეგიონისთვის.
საქართველოს მასშტაბით, პროექტის „დანერგე მომავალი“ ფარგლებში გაშენებული ბაღები 10,000 ჰა-მდე ფართობს შეადგენს. შიდა-ქართლის რეგიონში, სხვადასხვა ხეხილის ბაღი, ჯამში, 2,400 ჰა-მდე მიწის ფართობზე გაშენდა, გაცემულმა თანადაფინანსებამ 16 მლნ-მდე ლარი შეადგინა.
