მიმდინარე წლის იანვარ-მარტში საქართველოდან აზერბაიჯანში ექსპორტირებულია 63,232 ლიტრი ყურძნის ნატურალური ღვინო, რომლის ღირებულება 242,5 ათასი აშშ დოლარია. საქართველოს სტატისტიკის ეროვნული სამსახურის მონაცემებით, ექსპორტის მოცულობა 2.2-ჯერ გაიზარდა გასული წლის ანალოგიურ პერიოდთან შედარებით.
აზერბაიჯანში ექსპორტზე გადის საქართველოში მოპოვებული სპილენძის მადნები და კონცენტრატები, ფეროშენადნობები, ქართული ღვინო, ბუნებრივი, მინერალური და გაზიანი წყლები, ასევე მინერალური სასუქები.
ცნობისთვის, 2030 წლისთვის, საქართველო 1 მლრდ. აშშ დოლარის ღირებულების ღვინის ექსპორტს გეგმავს. სოფლის მეურნეობის მინისტრის ინფორმაციით, ქართული ღვინის ექსპორტმა 100 მლნ ბოთლს მიაღწია. ორიენტირი კი, ექსპორტის შემდგომ ზრდაზეა მიმართული. სახელმწიფოს გეგმით, მიზნობრივ ბაზრებზე ქართული ღვინო ნიშურიდან საერთაშორისოდ დამკვიდრებულ კატეგორიაში უნდა გადავიდეს.
აზერბაიჯანი საქართველოს უმსხვილესი სავაჭრო პარტნიორია. აზერბაიჯანი საქართველოს საექსპორტო ბაზრებს შორის მესამე ადგილს იჭერს, ჩინეთისა და რუსეთის შემდეგ. მიმდინარე წლის იანვარ-მარტში აზერბაიჯანში დაექსპორტა 104.6 მლნ. აშშ დოლარის პროდუქცია.
ადგილობრივ ექსპორტში კი აზერბაიჯანი საქართველოს უმსხვილეს საექსპორტო ქვეყნებს შორის მეცხრე ადგილზეა. წელს პირველ სამ თვეში აზერბაიჯანში 18.9 მლნ. დოლარის ქართული ნაწარმი გაიყიდა, რაც სამთვიანი მთლიანი ადგილობრივი ექსპორტის 3.1%-ია. 2021 წლის პირველ სამ თვეში აზერბაიჯანში ქართული ნაწარმის ექსპორტი გაზრდილია 16.4%-ით 2020 წლის იანვარ-მარტთან შედარებით.
2021 წლის იანვარ-მარტის ვაჭრობის შედეგად, აზერბაიჯანი იმპორტიორ ქვეყანათა ათეულში მეოთხე ადგილს იჭერს საქართველოში განხორციელებული 145.7 მლნ აშშ დოლარიანი იმპორტით, რაც ქვეყნის მთლიანი იმპორტის 5.9%-ია. წლიურ ჭრილში საქართველოში აზერბაიჯანული იმპორტი 11.4%-ითაა შემცირებული, თუმცა კლების მიუხედავად ეს ქვეყანა საქართველოს უმსხვილეს იმპორტიორ ქვეყანათა ხუთეულში რჩება. 2021 წლის იანვარ-მარტში საქართველომ აზერბაიჯანში გაიტანა 104. 5 მლნ დოლარის ექსპორტი, შესაბამისად, საქართველოს უარყოფითი სავაჭრო სალდო აზერბაიჯანთან 41. 2 მლნ დოლარია.
აზერბაიჯანი საქართველოს უმსხვილეს სავაჭრო პარტნიორ ქვეყანათა შორის მეოთხე ადგილზეა. ორ ქვეყანას შორის 2021 წლის იანვარ-მარტში სავაჭრო ბრუნვა 250. 3 მლნ. დოლარს გაუტოლდა, რაც საქართველოს საგარეო ვაჭრობის მთლიანი ბრუნვის 9%-ია.
ბელა გელაშვილი
ავტორი