"საპარტნიორო ფონდის" ახალი საინვესტიციო აქტივობა შეზღუდული იქნება და ფონდი მხოლოდ უკვე არსებული პროექტებს დააფინანსებს. ამის შესახებ აღნიშნულია საქართველოსა და საერთაშორისო სავალუტო ფონდს შორის დასრულებული პროგრამის მერვე მიმოხილვაში. ეს პირობა სავალუტო ფონდთან არსებულ პროგრამაში უკვე რამდენიმე წელია არსებობს. დოკუმეტში საუბარია საქართველოს მთავრობის მიერ IMF-თან შეთანხმებულ საკითხებზეც. სავალუტო ფონდის შეფასებით, აუცილებელია, გაიზარდოს სახელმწიფო საწარმოების ეფექტიანობა, რათა მათი მხრიდან მომავალი ფისკალური წნეხი შემცირდეს.
ცნობისთვის, საპარტნიო ფონდის და სახელმწიფო საწარმოების სექტორის რეფორმირება საქართველოს მიერ IMF-თან აღებული ვალდებულებების ნაწილია.
„საპარტნიორო ფონდის“ 2019 წლის კონსოლიდირებული ფინანსური ანგარიშგების მიხედვით, ფონდის ყველა ძირითადი ფინანსური მაჩვენებელი პოზიტიურია. „საპარტნიორო ფონდის“ შემოსავლები 22%-ით გაიზარდა, რეკორდულ მაჩვენებელს მიაღწია და 2 მილიარდ ლარს გადააჭარბა. ჯამური აქტივები 3%-ით გაიზარდა და 6 მილიარდი ლარს შეადგენს, ხოლო კაპიტალი 5%-ით გაიზარდა და 1.9 მილიარდი ლარია. შედეგად, ფონდის 2019 წლის კონსოლიდირებულ ფინანსურ მაჩვენებლებში 70.9 მილიონი ლარის წმინდა მოგება დაფიქსირდა.
„საპარტნიორო ფონდი“, კანონმდებლობის მოთხოვნის შესაბამისად, ყოველწლიურად წარადგენს ორი სახის ფინანსურ ანგარიშგებას: კონსოლიდირებულს და ინდივიდუალურს. კონსოლიდირებული ფინანსური ანგარიშგება ასახავს ფონდის და მის მფლობელობაში არსებული სტრატეგიული შვილობილი კომპანიების შედეგებს, ინდივიდუალური კი - ფონდის საინვესტიციო საქმიანობის შედეგს. აუდიტორული დასკვნის თანახმად, „საპარტნიორო ფონდის“ მხოლოდ საინვესტიციო საქმიანობიდან მიღებულმა წმინდა მოგებამ, სახელმწიფო შვილობილი კომპანიების გარდა, 44 მილიონი ლარი შეადგინა.
„საპარტნიორო ფონდის“ აუდიტი მოიცავს ფონდის და მისი სტრატეგიული შვილობილი კომპანიების აუდიტს. შესაბამისად, სამუშაოს დიდი მოცულობიდან გამომდინარე, ფონდის საბოლოო ფინანსური ანგარიშგება ყოველი საანგარიშგებო წლის დასრულებიდან მომდევნო წლის მეორე ნახევარში ქვეყნდება.
„საპარტნიორო ფონდის“ განმარტებით, 2019 წლის ფინანსური შედეგები წინა წელთან შედარებით, მკვეთრად გაუმჯობესებულია. შეგახსენებთ, რომ 2018 წლის კონსოლიდილებულ ანგარიშგებაში ასახული ზარალი განპირობებული იყო ფონდის შვილობილი კომპანიის, „საქართველოს რკინიგზის“ ბალანსიდან ე.წ. „შემოვლითი რკინიგზის“ პროექტის აქტივის ჩამოწერით, რის შედეგადაც 2018 წელს „საქართველოს რკინიგზის“ ზარალმა 717 მლნ ლარი შეადგინა. აღნიშნული ზარალი, „საპარტნიორო ფონდის“ იმ პერიოდის კონსოლიდირებულ ანგარიშგებაშიც აისახა.
ფონდის განმარტებით, ასევე შეგახსენებთ, რომ შემოვლითი რკინიგზის პროექტი ყოველგვარი ფინანსური დასაბუთების გარეშე, ინიცირებული 2010 იყო. მასზე 210 მლნ აშშ დოლარი დაიხარჯა და კომერციულად მიზანშეუწონლობის გამო, 2013 წელს შეჩერდა.
ბელა გელაშვილი
ავტორი