აჭარის მთავრობის თავმჯდომარის თორნიკე რიჟვაძის განცხადებით, სახელმწიფო უწყებებთან ერთად კერძო სექტორი მაქსიმალურად იქნება ჩართული, რომ სასტუმროებში უსაფრთხოების სტანდარტები მაქსიმალურად დაინერგოს.
რიჟვაძის თქმით, დღეიდან, დამაკმაყოფილებელი ეპიდემიოლოგიური მდგომარეობის გამო, ქობულეთში შეზღუდვები შემსუბუქდება.
„როგორც მოგეხსენებათ ბოლო ერთი კვირაა, ჩვენ უკვე არ გვიფიქსირდება არც ერთი დაინფიცირების შემთხვევა და ყოველდღიურად დაახლოებით 300 ტესტზე მეტი კეთდება. ამიტომ ჩვენ უკვე დღეიდან პრაქტიკულად მოგვეცემა შესაძლებლობა, რომ შევამსუბუქოთ და მოვხსნათ შეზღუდვები ქობულეთის 4 ადმინისტრაციულ ერთეულში.
რაც შეეხება სასტუმროებს, გარდა იმ ხელშეწყობის ღონისძიებისა, დანაწესები იქნება, რომ მაქსიმალურად უნდა მოხდეს ჯანდაცვის რეკომენდაციების ასევე უსაფრთხოების გათვალისწინება. ამ კუთხით სახელმწიფო უწყებებთან ერთად კერძო სექტორი მაქსიმალურად იქნება ჩართული, რომ ეს სტანდარტები გაითვალისწინონ როგორც შიდა კონკურენციის ნაწილში, იგივე სასტუმროებში, ასევე გლობალური კონკურენციის ნაწილში მაქსიმალურად დაინერგოს უსაფრთხოების სტანდარტები“, – განაცხადა თორნიკე რიჟვაძემ.
შეგახსენებთ, აჭარა,შესაძლოა, მწვანე ტურზონად გამოცხადდეს.
თორნიკე რიჟვაძის თქმითვე, რიჟვაძის განმარტებით, ტურიზმის ხელშეწყობისთვის რესურსები ავტონომიის ბიუჯეტშიც იქნება გამოყოფილი.
ტურიზმის ეროვნული ადმინისტრაციის ხელმძღვანელის, მარიამ ქვრივიშვილის თქმით, შესაძლებელია,აჭარა იყოს ერთ-ერთი იმ ოფციებს შორის, რომელიც იქნება დამატებით მწვანე ზონად დაპოზიციონირებული.
ცნობისთვის, აჭარას, ისევე, როგორც სხვა ტურისტულ ადგილებს საერთაშორისო ვიზიტორების მიღება 1-ელი ივლისიდან, ხოლო საქართველოს მოქალაქეების, 15 ივნისიდან შეეძლება.
გუშინ ტურიზმის გახსნის გეგმის პრეზენტაციის მთავარი გზავნილი იყო, რომ საქართველო უსაფრთხო ტურისტული იმიჯით უნდა დაპოზიციონირდეს საერთაშორისო ტურიზმის ბაზარზე.
საქართველოში ტურიზმი სამ ეტაპად გაიხსნება.
ტურიზმში ახალი მოთხოვნები ჩნდება და მთავრობა ცდილობს ეკონომიკის ამ სეგმენტს შეუწყოს ხელი ამ მოთხოვნების დასაკმაყოფილებლად.
როგორც გუშინ პრემიერმა გახარიამ განაცხადა, საქართველო უსაფრთხო ტურისტულ ზონებს გამოყოფს, როგორიცაა, წყალტუბო, გუდაური, საირმე, აბასთუმანი, ბორჯომი და სხვა.
მთავრობის მეთაურის თქმითვე, ჯანდაცვის სამინისტროს აქვს მიღებული დავალებები, რომ საზღვრებზე უნდა გაძლიერდეს თითოეული შემომსვლელი ადამიანის კონტროლი.
გახარიას ინფორმაციით, 15 ივნისიდან საქართველო გაიხსნება ადგილობრივი ტურიზმის სერვისებისმიწოდებისთვის,ხოლო პირველი ივლისიდან კი, საქართველო იქნება მზად იმისთვის, რომ მიიღოს უცხოური ტურისტები.
გუშინ ცნობილი გახდა, რომ გიდებისთვის მთავრობა ცალკე სპეციფიკურ პროგრამას ამუშავებს, რომელიც სულ მალე გასაჯაროვდება. ამ ეტაპზე ცნობილია, რომ გიდებისთვის შეღავათები და სპეციალური პლატფორმა ამოქმედდება.
ტურიზმის გახსნის პროგრამის პრეზენტაციაზე გაცხადდა, რომ მთავრობა საბანკო გარანტიის პროცენტს ტურისტულ კომპანიებს 6 თვე დაუსუბსიდირებს.
ეკონომიკის მინისტრის ინფორმაციით, სასტუმროების სესხების სუბსიდირებისთვის მთავრობას 60 მილიონი ლარი აქვს გამოყოფილი.
მთავრობის გადაწყვეტილებითვე, გადასახადები 6 118-მა ტურისტულ ბიზნესს გადაუვადდა.
კერძოდ, მთავრობის გადაწყვეტილებით, ტურინდუსტრიის კომპანიებს საშემოსავლო გადასახადი წლის ბოლომდე გადაუვადდებათ.
პრემიერ-მინისტრის თქმით, ტურიზმის სექტორი სრულად გათავისუფლდა ქონების გადასახადისგან.
პოსტკრიზისული გეგმის ფარგლებში, სარესტორნე ბიზნესის ახალ სესხებს მთავრობა 90%-ით თანაუზრუნველყოფს, ხოლო უკვე არსებული სესხების რესტრუქტურიზაციის დროს სარესტორნე ბიზნესს სახელმწიფო 30%-ის თანაუზრუნველყოფაში დაეხმარება.
მთავრობა სესხებს უსუბსიდირებს სასტუმროების ნაწილსაც.კერძოდ, ყველა სასტუმროს, რომლის წლიური ბრუნვაც 20 მილიონ ლარამდე იყო, დაუსუბსიდირებათ საბანკო სესხის პროცენტის 80%-ს სესხის პირველ 5 მილიონ ლარზე.
ტურიზმის ადმინისტრაციის ხელმძღვანელის, მარიამ ქვრივიშვლის თქმით, ტურიზმის ყველა სეგმენტისთვის მთავრობა განსხვავებულ გაიდლაინებს შეიმუშავებს.
მისივე თქმით, აჭარა მწვანე ზონად დაპოზიციონირდება.
ტურიზმის სტიმულირებისთვის, მთავრობა საავიაციო პოლიტიკას ახალ რეალობას მოარგებს.
ეკონომიკის მინისტრი ქვეყანაში უპირველესად რეგიონის ტურისტებს ელოდება, თუმცა მთავრობა ევროპელი ტურისტების მოსაზიდადაც აქტიურად იმუშავებს. ეკონომიკის მინისტრის თქმით, ამ ეტაპზე რუსეთთან რაიმე მოლაპარაკებები არ მიმდინარეობს, თუმცა ქვეყანა, უსაფრთხოების ზომების დაცვით, მზად არის, რუსი ტურისტებიც მიიღოს და უმასპინძლოს.
თურნავას პროგნოზით, მარტივი იქნება აღდგეს ფრენები იმ ტრადიციული მიმართულებებით, რომელიც აქამდე გვქონდა და მოლაპარაკებები როგორც ავიაკომპანიებთან, ისე ქვეყნის მთავრობებთან უკვე აქტიურად მიმდინარეობს.
შეგახსენებთ, 11 მაისიდან ყველა სახის წარმოება და ყველა მაღაზია გაიხსნება, გარდა ფეხსაცმლისა და ტანსაცმლისა.
ცნობისთვის, მთავრობა ამ დღეებში 4 სექტორის მხარდაჭერის გეგმას გაასაჯაროებს. ესაა: ტურიზმი, სოფელი, მშენებლობა და განათლება.
ბელა გელაშვილი
ავტორი