მეთხილე ფერმერები წელს რეკორდულ მოსავალს ელოდებიან. თხილის მოსავლის აღება დაიწყო.
გარემოს დაცვისა და სოფლის მეურნეობის სამინისტროს ცნობით, თხილის გადამმუშავებელ საწარმოში უკვე ჩაბარებულია მოსავლის პირველი პარტია, რომელიც უახლოეს დღეებში ექსპორტზე გავა.
"თხილის მოსავლის პირველი პარტია, გატეხილი თხილის გულის სახით, ამ დღეებში გერმანიაში გაიგზავნება ექსპორტზე. თხილის წარმოების გამართული ჯაჭვი ფერმერებს მაღალპროდუქტიულობაში ეხმარება, რაც მათთვის ხდება სტიმული, აწარმოონ მეტი თხილი," - ამბობს გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი.
წელს 50-55 ათას ტონამდე თხილის მოსავალს ელოდებიან, რაც, წინა წელთან შედარებით, მნიშვნელოვნად გაუმჯობესებული მაჩვენებელია.
თხილის მწარმოებელთა ასოციაციის განმარტებით, თხილის ექსპორტის ხაზი ევროპასთან არ გაწყვეტილა. რაც შეეხება მოსავლიანობას და შემოსავლიანობას, თხილის მწარმოებელთა ინფორმაციით, თხილის წლევანდელი ხარისხიანი და ჭარბო მოსავალი ფერმერებს 0,5 მილიარდ ლარის შემოსავალს მოუტანს.
სეზონის დაწყებამდე ვრცელდებოდა ინფორმაცია, რომ თხილის ღირებულება 9 ლარს მიაღწევდა, თუმცა აგვისტოს დასაწყისში 1 კილოგრამი თხილი 3.50-4 ლარის ფარგლებში იყიდებოდა.
თხილის მწარმოებელთა ასოციაცია განმარტავს, რომ ფასი კიდევ შეიცვლება, თუმცა, რა მაქსიმუმს მიაღწევს იგი, სავარაუდოდ, უახლოეს პერიოდში დაზუსტდება.
ცნობისთვის, საქართველოს თხილის მწარმოებელთა ასოციაცია დაახლოებით 25 000 ფერმერს აერთიანებს, ხოლო მათ საკუთრებაში არსებული თხილის ფართობის მოცულობა 30 000 ჰექტარზე მეტს შეადგენს.
შეგახსენებთ, პრემიერმა გახარიამ ლევან დავითაშვილს რთველისა და თხილის სეზონისთვის მაქსიმალური ყურადღება და მზადყოფნა დაავალა.
აღსანიშნავია, რომ აგრობიზნესის მხარდამჭერი სახელმწიფო პროგრამები ფართოვდება. მთავრობის პროგრამებს დაემატება თხილის გადამუშავება, ჩაის წარმოება და სასურსათო წარმოება.
ბელა გელაშვილი
ავტორი