ე.წ. კანონიერი ქურდის "ლავასოღლის" (მინდია გორაძის) მხარდამჭერ აქციაზე დაკავებული 9 პირის სასამართლო პროცესი დღეს გაიმართა.
ბათუმის საქალაქო სასამართლომ ყველა დაკავებული 1000-1000 ლარით დააჯარიმა და სიტყვიერი გაფრთხილება მისცა.
9 პირი პოლიციის კანონიერი მოთხოვნისადმი დაუმორჩილებლობის ბრალდებით იყო დაკავებული. თავის მხრივ, ბრალდებულები აცხადებდნენ, რომ მათ სამართალდამცავების მოწოდება არ გაუგიათ.
ცნობისთვის, გუშინ სარფი-ბათუმის დამაკავშირებელ გზაზე აქციის დროს 9 ადამიანი დააკავეს. ისინი მინდია გორაძის თურქეთიდან ექსტრადირებას ან გათავისუფლებას ითხოვდნენ. ბათუმის იუსტიციის სახლთან კი 17 პირი აგრძელებს შიმშილს, მათ კარვები აქვთ გაშლილი. დაკავება ადმინისტრაციულ სამართალდარღვევათა კოდექსის 173-ე მუხლით განხორციელდა, რაც სამართალდამცველების კანონიერ მოთხოვნაზე დაუმორჩილებლობას გულისხმობს.
ანტონ თათვიძე
ავტორი