მიხეილ სააკაშვილის მომდევნო სასამართლო პროცესი 29 ნოემბერს, 11 საათზე ჩაინიშნა. გადაწყვეტილებით უკმაყოფილოა ექსპრეზიდენტი დაცვის მხარე. ადვოკატები ამბობენ, რომ მოსამართლე დროს პოლიტიკური მოტივით წელავს დროს.
"ახლა ჩანიშნავენ პროცესებს 1 კვირა, 10 დღის ფარგლებში და დაელოდებიან მიხეილ სააკაშვილის კრიტიკულად დამძიმებას. ისინი ელოდებიან მიხეილ სააკაშვილის იმ მდგომარეობაში ჩავარდნას, რომ ნამდვილად გადაადგილება ვერ შეძლოს, ისინი ელოდებიან იმ მდგომარეობას, როდესაც მიხეილ სააკაშვილი ვერ შეძლებს საუბარს და ამის შემდგ დაიწყებენ ჩვენ მზად ვართ, საბადრაგო სამსახური მზად არის, მაგრამ მიხეილ სააკაშვილი ვერ მოდისო.., ისინი ელოდებიან მდგომარეობას, როდესაც ქუჩის პროტესტი ჩაცხრება და ხალხი გატყდება ან ხალხი მიაღწევს შედეგს, ყველაფერი შეიცვლება და ისინიც გახდებიან თავისუფალი" - ამბობს ბასილაია.
ბასილაიას თქმით, მოსამართლეს მიხეილ სააკაშვილის სასამართლოზე დისტანციურად დასწრების წინადადებაც აღარ განუხილვს, რადგან ასეთ შემთხვევაშიც შესაძლებელია მისი გამოჩენა საზოგადოების წინშე, რაც ხელისუფლების ინტერსში არ შედის.
ცნობისთვის, დღეს თბილისის საქალაქო სასამართლოს დარბაზი მიხეილ სააკაშვილის ადვოკატებმა პროტესტის ნიშნად დატოვეს. პროტესტის მიზეზი მოსამართლის უარი გახდა, პროცესზე დაეშვა მესამე პრეზიდენტის სხვა ადვოკატები - ნიკა გვარამია და დიმიტრი საძაგლიშვილი. როგორც გვარამიამ განმარტა, ჩანაცვლების მოთხოვნა იმით იყო განპირობებული, რომ მას და დიმიტრი საძაგლიშვილს, დამატებითი გარემოებების შესახებ ჰქონდათ ინფორმაცია, ხოლო დარბაზში მყოფი ადვოკატებისთვის აღნიშნული ინფორმაციის მიწოდება გართულდებოდა.
თბილისის საქალაქო სასამართლოსთან საქართველოს ყოფილი პრეზიდენტის მიხეილ სააკაშვილის სასამართლო სხდომა დღეს 1 საათის დაგვიანებით დაიწყო. სხდომას არ ესწრებიდა თავად ბრალდებული.
სასამართლო პროცესს მიხეილ სააკაშვილი იუსტიციის სამინისტროს სპეციალური პენიტენციური სამსახურის გადაწყვეტილებით არ ესწრება.
მიხეილ სააკაშვილის ადვოკატის, ბექა ბასილაიას განმარტებით, მიუხედეავად ტკივილებისა და საერთო სისუსტისა, მიხეილ სააკაშვილი მზად არის მოიკრიბოს ძალები და დაესწროს სასამართლო პროცესს, რის საშუალებასაც მას პენიტენციური სამსახური არ აძლევდა. ამასთან, ბასილაია ამბობს, რომ პენიტენციურ სამსახურს კანონი არ აძლევს ამ გადაწყვეტილების მიღების უფლებას. ბასილაია ამბობდა, რომ სააკაშვილი არის მხნედ და განწყობილია სასამართლო პროცესზე გამოსვლისთვის.
როგორც ბასილაიამ აღნიშნა, მესამე პრეზიდენტს არც კი შეატყობინეს, რომ პროცესზე დასწრებასთან დაკავშირებით სასამართლოდან შესაბამისი მოთხოვნა იყო გაგზავნილი.
პროცესზე საქმის პროკურორმა ჯარჯი წიკლაურმა დააყენა შუამდგომლობა, რომ მსჯავრდებულ მიხეილ სააკაშვილი პროცესებში სასჯელაღსრულების დაწესებულებაში, ან დაწესებულებიდან სასამართლოში დისტანციურად ჩაერთოს. რაზეც ადვოკატებმა უარი განაცხადეს და აღნიშნეს, რომ სააკაშვილი მზად არის პროცესს სასამართლო დარბაზში დაესწროს.
თავის მხრივ ადვოკატებმა მიხეილ სააკაშვილის ადვოკატები მოსამართლეთა კოლეგიის ნინო ელიეშვილის, მაია ქოქიაშვილისა და ლია ორკოდაშვილი აცილება მოითხოვეს.
სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.
საქართველოს ყოფილ პრეზიდენტს ბრალი საქართველოს სისხლის სამართლის კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია. აღნიშნული ბრალი სასჯელის სახედ და ზომად 5-დან 8 წლამდე ვადით თავისუფლების აღკვეთას ითვალისწინებს.
მიხეილ სააკაშვილი 41 დღეა შიმშილობს.
