სააპელაციო სასამართლომ, გადაწყვეტილება "ქართული ოცნების" პოლიტიკური მითითებების შესაბამისად მიიღო, - ამის შესახებ Report.ge-ს "ნაციონალური მოძრაობის" ლიდერის ნიკა მელიას ადვოკატმა ბექა ბასილაიამ განუცხადა.
როგორც უფლებადამცველმა აღნიშნა, ვიდრე სასამართლო "ქართული ოცნების" პოლიტიკური ნების შესაბამისად მოქმედებს, არ აქვთ მოლოდინი, რომ მათი არგუმენტები გათვალისწინებული იქნება.
მისივე თქმით, მიუხედავად ყველაფრისა, ისინი ყველა იმ რესურსს გამოიყენებენ, რასაც კანონი იძლევა.
"ამ გადაწყვეტილებაში გამართული სამართლებრივი მსჯელობა იურიდიული შეფასებას საერთოდ არ იმსახურებს, რადგან ოროსანი სტუდენტის მსჯელობაა გოგინაშვილის გადაწყვეტილებაში მოცემული. ეს გადაწყვეტილება არის ის, რომ "ქართულ ოცნებას" ამ ეტაპზე, ნიკა მელიას გათავისუფლება არ სურს.
ვიდრე სასამართლო თავიდან ბოლომდე მოქმედებს "ქართული ოცნების" პოლიტიკური ნების შესაბამისად, ჩვენ არ გვაქვს მოლოდინი, რომ სასამართლო ჩვენს არგუმენტებს გაითვალისწინებს და სამართლებრივ დასაბუთებას მიიღებს. თუმცა, ჩვენ ყველა იმ სამართლებრივ რესურსს გამოვიყენებთ, რასაც კანონი იძლევა", - განუცხადა Report.ge-ს ადვოკატმა ბექა ბასილაიამ.
ცნობისთვის, „ერთიანი ნაციონალური მოძრაობის“ თავმჯდომარის, ნიკა მელიას ადვოკატების საჩივარი თბილისის სააპელაციო სასამართლომ დასაშვებად არ ცნო.
შეგახსენებთ, რომ "ნაციონალური მოძრაობის" თავმჯდომარე ნიკა მელია პარტიის ოფისში 23 თებერვალს დააკავეს.
თბილისის საქალაქო სასამართლოს მოსამართლე ნინო ჩახნაშვილმა 17 თებერვალს სრულად დააკმაყოფილა პროკურატურის მოთხოვნადა მას პატიმრობა შეუფარდა. საქართველოს გენერალური პროკურატურა ნიკა მელიასთვის პატიმრობის შეფარდებას, დაცვის მხარე, კი აღკვეთის ღონისძიების გაუქმებას ითხოვდა. პროცესს თავად ბრალდებული არ ესწრებოდა.
პროცესზე ,,ნაციონალური მოძრაობის“ თავმჯდომარის ადვოკატებმა მოსამართლე ნინო ჩახნაშვილის აცილება მოითხოვეს. როგორც ისინი აცხადებდნენ, პარტიის ოფისთან, სპეციალური დანიშნულების რაზმი იყო მობილიზებული, რაც იმაზე მიუთითებდა, რომ გადაწყვეტილება მელიას დაპატიმრების შესახებ წინასწარ იყო ცნობილი. მოსამართლემ ადვოკატების შუამდგომლობა არ დააკმაყოფილა და მელიას პატიმრობა შეუფარდა.
პრემიერ-მინისტრ გიორგი გახარიას გადადგომასთან დაკავშირებით შინაგან საქმეთა სამინისტრომ სასამართლო გადაწყვეტილების აღსრულება რამდენიმე დღით გადადო.
საქართველოს პარლამენტმა 16 თებერვალს ნიკა მელიას იმუნიტეტი მოუხსნა.
შეგახსენებთ, რომ 2019 წლის 20-21 ივნისის მოვლენებთან დაკავშირებით, ნიკა მელიას ბრალად ედება საზოგადოებრივი უშიშროების და წესრიგის წინააღმდეგ მიმართული მძიმე კატეგორიის, ძალადობრივი დანაშაულის ჩადენა.
თბილისის საქალაქო სასამართლომ ნიკა მელიას 2019 წლის 27 ივნისს, აღკვეთის ღონისძიების სახით 30 000-ლარიანი გირაო შეუფარდა.
პროკურატურის განცხადებით, ,,ნაციონალური მოძრაობის" თავმჯდომარეს გირაოს პირობების შეუსრულებლობის გამო მანამდე გამოყენებული აღკვეთის ღონისძიება გაუმკაცრდა და გირაოს ოდენობა 40 000 ლარით გაიზარდა. აღნიშნულთან დაკავშირებით ნიკა მელია პროკურატურაში დაიბარეს თუმცა არ გამოცხადდა. ამავე დღეს, პროკურატურამ ნიკა მელიას გირაოს პირობების შესასრულებლად დამატებითი ერთკვირიანი ვადა მისცა.
,,ერთიანი ნაციონალური მოძრაობის" თავმჯდომარე აცხადებდა, რომ დაკისრებული გირაოს გადახდას არ აპირებდა და თუ ვინმე მის ნაცვლად გადაიხდიდა, ეს იქნებოდა "ქართული ოცნების" მხრიდან მოწყობილი პროვოკაცია.
ნიკა მელია ამჟამად რუსთავის მე-12-ე სასჯელაღსრულების დაწესებულებაშია გადაყვანილი.
