საქართველოს პროკურატურა გიორგი შაქარაშვილის მკვლელობის საქმესთან დაკავშირებით გავრცელებულ ფარულ ვიდეო-ჩანაწერებთან დაკავშირებით განცხადებას ავრცელებს.
უწყების ცნობით, სისხლის სამართლის საქმეზე მიმდინარე გამოძიების ფარგლებში, სასამართლოს განჩინების საფუძველზე, ბრალდებულების საპატიმრო საკნებში განხორციელდა ფარული საგამოძიებო მოქმედებები.
"მოპოვებული ვიდეო-აუდიო მასალა, მტკიცებულების სახით ერთვის გიორგი შაქარაშვილის მკვლელობის სისხლის სამართლის საქმეს. ზემოაღნიშნული მასალა, საპროცესო კანონმდებლობის შესაბამისად, განსაიდუმლოების შემდეგ სხვა მტკიცებულებებთან ერთად, ბრალდების მხარემ 2020 წლის 3 სექტემბერს გადასცა მხოლოდ დაცვის მხარეს. აღნიშნული ჩანაწერების წარმომავლობასთან დაკავშირებით ყველა სხვა სახის ინტერპრეტაცია არ შეესაბამება სიმართლეს", - აცხადებენ პროკურატურაში.
აღნიშნული ვიდეო-მასალის ფრაგმენტები დღეს "ტვ პირველის" გადაცემა "შაბათის" ეთერში გასაჯაროვდა.
