თბილისში, ხორავას ქუჩაზე დავით სარალიძის მკვლელობის ბრალდებით დაკავებული მიხეილ კალანდიას საქმეზე, თბილისის საქალაქო სასამართლოში პროცესი მიმდინარეობს.
ბრალდებულ მიხეილ კალანდიას ადვოკატის, ზურაბ თოდუას თქმით, სასამართლო პროცესზე დღეს მოწმეები დაიკითხებიან.
„ მიმდინარეობს მოწმეების დაკითხვა. წარმოდგენილია სავარაუდოდ, ორი სრულწლოვანი. ვნახოთ, რა ინფორმაციებს მიაწვდიან და იმის მიხედვით გვექნება კითხვები“, - განაცხადა ადვოკატმა ზურაბ თოდუამ სასამართლო სხდომის დაწყებამდე.
ცნობისთვის, მიხეილ კალანდია ხორავას ქუჩაზე დავით სარალიძის ჯგუფურად დამამძიმებელ გარემოებებში ჩადენილი მკვლელობის ბრალდებით სამართალდამცავებმა 2019 წლის 4 ივნისს დააკავეს.
თბილისში, ხორავას ქუჩაზე, მოზარდებს შორის სისხლიანი გარჩევა 2017 წლის 1-ელ დეკემბერს მოხდა. ახალგაზრდებს შორის მოხდარი დაპირისპირების შედეგად ორი არასრწულოვანი - დავით სარალიძე და ლევან დადუნაშვილი მოკლეს. მიხეილ კალანდიას დავით სარალიძის განზრახ ჯგუფურად დამამძიმებელ გარემოებებში მკვლელობას ედავებიან.
ოჯახი და ადვოკატი კალანდიას დაკავებას პოლიტიკურად მოტივირებულად მიიჩნევს.
ირაკლი ვაჩიბერაძე
ავტორი