მკვლევარებმა შეიმუშავეს ახალი და გაუმჯობესებული ქსენობოტები, ბაყაყის უჯრედებისგან შექმნილი პატარა ბიოლოგიური აპარატები, რომლებსაც ახლა უკვე შეუძლიათ, საკუთარი თავის ორგანიზება და ერთ სხეულად მოქმედება, ასევე საკუთარი გარემოცვის დამახსოვრება.
განახლებული ქსენობოტები პირველად ტუფის და ვერმონტის უნივერსიტეტში შექმნეს, რა დროსაც გააუმჯობესეს მათი დიზაინი, გახადეს ისინი უფრო სწრაფი და სიცოცხლისუნარიანები. ამასთან, ქსენობოტებს მისცეს შესაძლებლობა კოლექტიური "მუშაობისა", ისევე როგორც მაგალითად ფუტკრების გუნდს აქვს.
”რობოტიკის სპეციალისტები დიდი ხნის განმავლობაში აკვირდებოდნენ ცხოველთა სამყაროში გუნდურ ქცევას, ბიოლოგები კი იკვლევდნენ ორგანიზმებში ამგვარ კოლექტიურ ინტელექტს. ეს ბიორობოტები არის რაღაც შუალედი მათ შორის, რაც, ჩემი აზრით, ძალიან საინტერესოა “, - თქვა ვერმონტის უნივერსიტეტის მკვლევარმა ჯოშ ბონგარდმა.
ორგანული მანქანები შეიქმნა სუპერკომპიუტერის დახმარებით, რომელიც იყენებდა ევოლუციურ ალგორითმს მიკროსკოპული გეგმების შესაქმნელად. ქსენობოტები ბაყაყის ემბრიონებისგან მოპოვებული ღეროვანი უჯრედებისგან მზადდება და მთლიანად ბიოდეგრადირებადია, რაც იმედს აჩენს, რომ ისინი შეიძლება ოდესმე გამოიყენონ ადამიანის ორგანიზმში და გარემოს დასუფთავებისთვის.
ბიოლოგიასა და უსულო ტექნიკას შორის საზღვრის გადაკვეთა ძალიან საპასუხისმგებლო რამაა. მკვლევარების ვარაუდით, მათ შესაძლოა ცხოვრების ახალი ფორმაც კი შექმნეს.
”მე არ ვიცი რა არის ეს, რობოტები, ბაყაყები თუ სულ სხვა რამ, ამაზე პასუხი არ მაქვს” - თქვა ბონგარდმა.
