ჩვენი გზა დეოკუპაციისკენ არის ნათელი, ეს არის მშვიდობიანი გზა, ამ მიმართულებით საქართველომ გააკეთა თავის განაცხადა, უარი თქვა ნებისმიერი ძალის გამოყენებაზე, მინდა, მოვუწოდო რუსეთს, რომ იგივე გზას გაყვეს ამ რეგიონში და საერთოდ დღევანდელ მსოფლიოში, – ამის შესახებ საქართველოს პრეზიდენტმა, სალომე ზურაბიშვილმა უკრაინის პრეზიდენტ ვლადიმირ ზელენსკისთან ერთად გამართულ პრესკონფერენციაზე განაცხადა.
მისი თქმით, დღეს საქართველოსა და უკრაინას აერთიანებთ არა მხოლოდ საუკუნოვანი მეგობრობა, არამედ პარალელური ამოცანები და ერთობლივი მიზნები.
„ეს არის ჩვენი ქვეყნებისა და ტერიტორიების დეოკუპაცია, ევროკავშირი და ნატო-სკენ მიმავალი გზა, ორმხრივი და რეგიონული თანამშრომლობის გაზრდა. დეოკუპაცია არის ჩვენი ქვეყნების ტკივილი, წუხილი და გამოწვევა. საქართველოს გამოწვევაა დეოკუპაცია და ამ კუთხით ახალი სტრატეგიის ჩამოყალიბება, დებორდერიზაცია, ადამიანის უფლებების დაცვა. არ შეიძლება, ამ მიმართულებით არ აღვნიშნო სტრასბურგის სასამართლოს დასკვნა, რაც არის საქართველოსთვის დიდი გამარჯვება და ოკუპირებულ ტერიტორიებზე მაცხოვრებელი მოქალაქეებთან ურთიერთობების აღდგენა.
არ შეიძლება, რუსეთისგან გაგრძელდეს ყოველდღიური პროვოკაციები, დელიმიტაციის ხაზზე გადაადგილება, გატაცებები. დღეს მინდა, კიდევ ერთხელ ვახსენო ჩვენი მოქალაქე გახელაძე, რომელიც არის 12 წლით დაკავებული, სახელმწიფო უწყებები მუშაობენ მისი გათავისუფლებისკენ და ყველა ჩვენი პარტნიორებისგან ველოდებით ამ კუთხით პირდაპირ მხარდაჭერას. ჩვენი გზა დეოკუპაციისკენ არის ნათელი, ეს არის მშვიდობიანი გზა. ამ მიმართულებით საქართველომ გააკეთა თავის განაცხადა და უარი თქვა ნებისმიერი ძალის გამოყენებაზე. მინდა, მოვუწოდო რუსეთს, რომ იგივე გზას გაყვეს ამ რეგიონში და საერთოდ დღევანდელ მსოფლიოში“, – განაცხადა სალომე ზურაბიშვილმა.
